Su basmış evlərdən 35 nəfər təxliyə olunub - RƏSMİ

Fövqəladə Hallar Nazirliyi ötən gecə Bakı şəhərində havanın yaratdığı fəsadlarla bağlı məlumat yayıb.

Nazirlikdən Teleqraf.com-a verilən məlumata görə, bəzi ərazilərdə fərdi yaşayış evlərinin həyətyanı sahələri, küçə və prospektlər yağış suları ilə dolub, nəqliyyatın hərəkətində məhdudiyyət yaranıb.

Güclü yağışların törətdiyi fəsadların aradan qaldırılması üçün dərhal Fövqəladə Hallar Nazirliyinin Xüsusi Riskli Xilasetmə Xidməti və Dövlət Yanğından Mühafizə Xidmətinin canlı qüvvə və texnikası paytaxtın rayonlarına cəlb olunub.

Aparılan xilasetmə əməliyyatları nəticəsində fərdi yaşayış evlərindən 17 nəfəri azyaşlı olmaqla ümumilikdə 35 nəfər təhlükəsiz əraziyə təxliyə olunub.

Hazırda yağış suları ilə dolmuş ərazilərdə suçəkmə işləri davam etdirilir.

İlhamə ƏBÜLFƏT