4 Noyabr 2016 14:36
406
12 Punto 14 Punto 16 Punto 18 Punto

Noyabrın 4-də Bakı Şəhəri üzrə Təhsil İdarəsində ikinci könüllülük proqramında iştirak etmiş 25 gəncə arayışlar təqdim olunub.

Təhsil İdarəsindən Teleqraf.com-a verilən məlumata görə, könüllüləri təbrik edən BŞTİ-nin nümayəndələri onların fəaliyyətinin yaddaqalan və səmərəli olduğunu söyləyib.

Bakı Şəhəri üzrə Təhsil İdarəsində onlara göstərilən diqqət və qayğıdan razılıqlarını ifadə edən gənclər, könüllü kimi 3 aylıq fəaliyyətləri dövründə öz ixtisasları üzrə və ümumi dünyagörüşlərinin inkişafı baxımından müsbət təcrübə qazandıqlarını nəzərə çatdırıblar.

Qeyd edək ki, Bakı Şəhəri üzrə Təhsil İdarəsi artıq 3 ildir ki, könüllü əsaslarla çalışmaq arzusunda olan gənclərlə əməkdaşlıq edir.

İntizamlı, xoşrəftar, kollektivdə çalışmağı, kompüterdə işləməyi bacaran, xarici dil biliklərinə malik, ali təhsilli və ya ali təhsil müəssisələrinin son kursunda oxuyan gənclər BŞTİ-nin müxtəlif sektorlarında 3 ay təcrübə keçmək imkanı qazanıblar. İndiyədək BŞTİ tərəfindən həyata keçirilmiş ilk könüllülük proqramında 15, ikinci proqram əsasında isə 25 nəfər iştirak edib. Onlardan 11 nəfəri hazırda BŞTİ-nin əməkdaşı kimi fəaliyyət göstərir. Hazırda davam edən üçüncü könüllülük proqramı üzrə 304 nəfər BŞTİ-yə müraciət edib. Hələlik onlardan 100 nəfərə yaxını müsahibəyə dəvət olunub. 20 nəfəri müsahibədən müsbət nəticə əldə edərək müvafiq sektorlarda fəaliyyətə başlayıb. Könüllü kimi 3 ay müddətində işləyib öhdəliklərini uğurla başa vuran gənclərin hər birinə BŞTİ tərəfindən müvafiq arayış verilir.

İlhamə ƏBÜLFƏT


Müəllif: