“Ermənistan bu yarışda Azərbaycanla ayaqlaşa bilmir” – “Atlas”ın şərhi

“Bloomberg” agentliyinin Azərbaycanın son 10 ildə silah alışına 22,7 milyard dollar xərcləməsi və bununla Avropada ən iri hərbi texnika idxalçısına çevrilməsi xəbəri müzakirə predmetinə çevrilib. Bəlkə də bu xəbər yerinə düşdü. Çünki, bu xəbər Ermənistana anlatmalıdır ki, bu qədər silah-sursat hərbi kazarmalarda saxlanmaq üçün alınmır”.

Teleqraf.com xəbər verir ki, bu fikir “Atlas” Araşdırmalar Mərkəzinin hazırladığı analitik yazıda öz əksini tapıb.

Yazıda bildirilir ki, Azərbaycan silahlanmaya hər il milyardlarla dollar xərcləmək məcburiyyətindədir. Bunun da əsas səbəbi Azərbaycan torpaqlarının işğal altında olmasıdır: “Faktiki Azərbaycan gələcək hərbi toqquşmaya hazırlaşır. Çünki, indiki şərtlər daxilində Dağlıq Qarabağ münaqişəsinin danışıqlar yolu ilə həlli mümkün deyil. Azərbaycan cəmiyyətinin aprel döyüşlərindən sonra böyük dövlətlərin Ermənistan hakimiyyətinə təzyiq edərək Dağlıq Qarabağ ətrafındakı rayonların danışıqlar yolu ilə azad olunacağına ümidləri özünü doğrultmadı. Əksinə, ATƏT-in Minsk Qrupu həmsədrləri torpaqların azad olunmasını Dağlıq Qarabağın status müzakirələri ilə əlaqələndirdilər. Bu isə münaqişənin “paket həll” variantıdır ki, Azərbaycan heç bir halda bunu qəbul etməyəcək.

Danışıqlarda hazırki susqun gedişat Azərbaycanın siyasi dairələrində və ictimaiyyətində belə bir inam formalaşdırır ki, torpaqları geri almaq üçün mütləq ordudan istifadə etmək lazım gələcək. Apreldəki döyüşlər də buna nümunədir. Azərbaycan ordusu bir neçə strateji yüksəkliyi geri aldı və Ermənistan bu yüksəklikləri yenidən nəzarəti altına almaq üçün əks-hücuma keçmədi. Reallıqla barışdı. Demək, Ermənistan daha böyük əraziləri itirməklə başqa reallıqla da barışa bilər. Qarşı tərəf Azərbaycan ordusunun daha böyük gücünü görməyənə qədər işğal altındakl torpaqları geri qaytarmayacaq”.

Materialda qeyd olunur ki, Azərbaycan silah və hərbi texnikanı yalnız Dağlıq Qarabağ münaqişəsinə görə əldə etmir: “Azərbaycan həssas bölgədə yerləşir. Belə bir bölgədə Azərbaycan mütləq şəkildə güclü orduya malik olmalı və silahlanmaya böyük pullar xərcləməlidir.

Birincisi, Azərbaycan güclü ordu formalaşdırmaqla kənar müdaxilələrdən özünü qoruyur və sığortalayır.

İkincisi, Yaxın Şərqdəki müharibələr və dövlətlərin parçalanması da Azərbaycanın güclü orduya malik olmasını diqtə edir”.

“Atlas” Araşdırmalar Mərkəzi bildirir ki, Dağlıq Qarabağ münaqişəsi olduğuna görə bölgənin böyük dövlətləri Azərbaycanın silahlamaya milyardlarla dollar xərcləməsinə normal yanaşırlar: “Ancaq Azərbaycanın torpaqları işğal altında olmasaydı, böyük dövlətlər rəsmi Bakının silahlanmaya bu qədər pul xərcləməsini narahatlıqla qarşılayardılar.

Rusiyanın Ermənistana verdiyi “İsgəndər” raketləri hələ də müzakirə predmetidir. Moskva Ermənistanla müqayisədə hərbi balansın Azərbaycanın xeyrinə pozulmasını istəmir. Ona görə də Moskva “İsgəndər” raketlərini Ermənistanda yerləşdirdi.

Buna cavab olaraq rəsmi Bakı hərbi balansın yenidən Azərbaycanın xeyrinə dəyişməsinə çalışır. Hazırda Bakı yeni və modern silahların alınması məqsədilə Pakistan, İsrail, Türkiyə və Ukrayna ilə danışıqlar aparır.

Azərbaycanın maliyyə gəlirləri ötən illə müqayisədə azalsa da, rəsmi Bakı əvvəlki illərdə olduğu kimi silah və hərbi texnikanın alınmasına milyardlarla dollar xərcləyəcək. Ermənistan bu yarışda Azərbaycanla ayaqlaşa bilmir. Bunu Ermənistan prezidenti Serj Sərkisyan da Rusiyanın “Sputnik” agentliyinə verdiyi son müsahibədə etiraf edib. Sərkisyanın ən böyük etirafı o idi ki, Ermənistanın silah almağa pulu yoxdur.

Silah almağa pulu olmayan Ermənistan daha çox Rusiyaya sığınmalı olur və bu onun müstəqlliyini məhdudlaşdırır. Belə çıxır ki, illərlə Dağlıq Qarabağın “müstəqilliyi” uğrunda savaşan, Azərbaycan və Türkiyə ilə düşmən olan, vətəndaşlarını ölümə göndərən Ermənistanın özü müstəqilliyini itirib”.

Səxavət