MTRŞ televizyalarla bağlı hüquq-mühafizə orqanlarına müraciət etdi

Milli Televiziya və Radio Şurası (MTRŞ) Bakıda qanunsuz fəaliyyət göstərən kabel televiziyaları ilə bağlı hüquq-mühafizə və vergi orqanlarına müraciət edib.

Bunu Trend-ə MTRŞ-nin Hüquq və beynəlxalq əlaqələr şöbəsinin müdiri Nemət Cavadov deyib.

Şöbə müdiri bildirib ki, qanunsuz kabel televiziyaları xüsusən yeni tikilən binalarda fəaliyyət göstərir.

Onun sözlərinə görə, hazırda Azərbaycanda 30-dan artıq lisenziyası olan kabel və İP televiziyası fəaliyyət göstərir:

“Qanunsuz fəaliyyət göstərən kabel televiziyalarının sayı isə çoxdur. Bunu dəqiq müəyyən etmək çox çətin məsələdir və hər binada bunları aşkara çıxarmaq olmur. Biz qanuni fəaliyyət göstərən kabel və İP televiziyalarının siyahısını hüquq-mühafizə və vergi orqanlarına təqdim etmişik. Artıq onlar bu siyahı əsasında hansı televiziyaların qanuni fəaliyyət göstərdiyini bilirlər və qanunsuz kabel televiziyaları ilə bağlı özləri tədbirlər görürlər”.

Nemət Cavadov vətəndaşların da diqqətli olmasının vacibliyini bildirib: “Vətəndaşlar bu kabel televiziya kanallarına qoşulan zaman onların qanuni olub-olmadığı ilə maraqlanmalıdırlar”.