“Ölkəyə gətirilən cənazələr diqqətlə yoxlanır” - Sanitariya-Karantin Müfəttişliyi

“Ötən il 19 telefonoqram vasitəsilə 24 hərarətli şəxs barədə məlumat verilib və ərazi tibb müəssisələri tərəfindən aparılmış müayinələr nəticəsində “donuz qripi” xəstəliyi qeydə alınmayıb”.

Teleqraf.com xəbər verir ki, bunu Sanitariya-Karantin Müfəttişliyinin Epidemiologiya şöbəsinin müdiri Yadulla Balaşov bu gün keçirdiyi mətbuat konfransinda deyib.

O bildirib ki, 2016-cı il ərzində “donuz qripi” xəstəliyinə görə epidemioloji vəziyyəti gərgin olan dövlətlərdən gələn şəxslər arasında aşkar edilmiş şübhəlilər və temperaturlular barədə gömrük-sərhəd keçid məntəqələrindəki gömrük xidməti əməkdaşları tərəfindən Respublika Sanitariya-Karantin Müfəttişliyinə müxtəlif məlumatlar daxil olub: "Həmin şəxslərin tibbi müşahidəyə alınmaları məqsədilə vaxtında telefonoqramlar vasitəsilə Respublika Gigiyena və Epidemiologiya mərkəzinə ötürülüb. Yoxlamalar zamanı "donuz qripi" aşkar edilməyib".

Şöbə müdiri qeyd edib ki, ötən il iyunun 28-də müfəttişliyə bir nəfər AİDS-lə yoluxmuş xəstə barədə məlumat daxil olub və müvafiq tədbir görülməsi üçün AİDS-lə Mübarizə Mərkəzinə məlumat verilib.

Yadulla Balaşov qeyd edib ki, respublikaya gətirilən 179 cənazə barədə dövlət sərhəd-keçid məntəqələrindən 86 faks daxil olub ki, cənazələr arasında yoluxucu xəstəliklərlə vəfat etmiş şəxs olmayıb: “ Yoluxucu xəstəlikdən vəfat etmiş şəxslərin dəfni zamanı epidemioloji qaydalara əməl edilir, profilaktik tədbirlər həyata keçirilir. Bu səbəbdən respublikaya gətirilən cənazələr daim nəzarətdə saxlanılır”.

İlhamə ƏBÜLFƏT