Bu ölkədə robot polisləri görsəniz təəccüblənməyin

Birləşmiş Ərəb Əmirliklərinin 7 əmirliyindən biri olan Dubayda polis rəsmiləri şəhərdə işə başlayacaq ilk robot polisi ictimaiyyətə təqdim ediblər.

Teleqraf.com xarici mediaya istinadla xəbər verir ki, robot polislər şəhərdəki alış-veriş mərkəzlərinə və turizm yerlərinə nəzarət edəcəklər.

Eyni zamanda, insanlar robotlara cinayətlər barədə məlumat verəcək , cərimə ödəyəcək və köksündəki ekrandan məlumat ala biləcəklər.

Robotlar polis tərəfindən toplanan məlumatları nəqliyyat işçilərinə ötürəcək.

Hökumət 2030-cu ilə qədər polis qüvvələrinin 25%-nin robotlaşdırılmasının planlaşdırıldığını bildirir.

Dubay Polisinin Elektron Xidmətlər İdarəsinin rəisi Xalid Əl Razuki robotların insanların yerini tutmayacağını da qeyd edib: "Polislərimizin yerlərini robotlar tutmayacaq. Lakin Dubayda yaşayanların sayı artır. Bu səbədən şəhərin təhlükkəsizliyini təmin etmələri üçün polis məmurlarının yerlərini dəyişdirəcəyik. Robotlarla 7 gün 24 saat xidmət göstərmək imkanımız olacaq"

Robot hazırda yalnız ərəb və ingilis dillərində ünsiyyət qura bilir. Gələcəkdə isə rus, çin, fransız və ispan dillərində də danışması hədəflənir.

Şəfiqə Nazimqızı