Bu sözləri Respublika Müalicəvi Diaqnostika Mərkəzi nəzdində Bakı Ürək Mərkəzinin kardiologiya şöbəsinin rəhbəri Abbasəli Abbasəliyev Teleqraf.com-a açıqlamasında deyib.
O, bildirib ki, xalq artisti bir neçə gün əvvəl ağır təngnəfəsliklə klinikaya daxil olub: “Qəndab Quliyevaya ciddi ürək çatışmazlığı diaqnozu qoyulub”.
Həkimin sözlərinə görə, xalq artistinin vəziyyəti hələlik stabil qiymətləndirilir: “Qəndab Quliyevanın müalicəsi bir xeyli davam edəcək.
Hazırda o, ciddi həkim nəzarəti altındadır. Hər ehtimala yaxın bir-iki günü də reanimasiyada saxlamağa davam edəcəyik”.
Qəndab Quliyeva 1949-cu il avqust ayının 10-da Füzuli rayonunun Dilağarda kəndində anadan olub. 1976-1980 cı illərdə Azərbaycan Dövlət Musiqi Məktəbində, 1991-1996 cı illərdə Azərbaycan Dövlət Musiqi və İncəsənət Universitetində təhsil alıb. İlk muğam müəllimi Nəriman Əliyev olmuşdur.
1981-ci ildən Azərbaycan Dövlət Opera və Balet Teatrında solist kimi fəaliyyət göstərib, Leyli, Əsli (Üzeyir Hacıbəyov: “Leyli-Məcnun”, “Əsli və Kərəm”), Ərəbzəngi (Müslüm Maqomayev: “Şah İsmayıl”), Şahcənəm (Z.Hacıbəyov: “Aşıq Qərib”), Gülbahar (Ş.Axundova: “Gəlin qayası”), Xanəndə qız (R.Mustafayev: “Vaqif”) rollarını yaradıb.
Qəndab Quliyevanın ifasında “Xaric Segah”, “Şahnaz”, “Mahur-Hindi”, “Bayatı-Şiraz”, “Şur” muğamlarının səsyazıları Qızıl Fondda saxlanılır.
Azərbaycan Dövlət Mədəniyyət və İncəsənət Universitetində muğamdan dərs deyir.