“Turan"a cinayət işi açıldı - Məhkəməyə müraciət

Qərarlarla razılaşmayan vergi ödəyicisinin məsələni məhkəmədə mübahisələndirməsi tamamilə normal haldır.

Bu barədə Teleqraf.com-a Media və Kommunikasiya Mərkəzindən açıqlama verilib.

Mərkəzdən bildirilib ki, “Turan" İnformasiya Agentliyinin Vergilər Nazirliyini məhkəməyə verməsi normal prosesdir: “Vergi orqanları vergi öhdəliklərinin yerinə yetirilməsinə nəzarət edir. Bu, onların birbaşa vəzifəsidir. Bu qərarlarla razılaşmayan vergi ödəyicisinin də məsələni məhkəmədə mübahisələndirməsi tamamilə normal haldır”.

"Report"un məlumatına görə, “ Turan" İnformasiya Agentliyi Vergilər Nazirliyi yanında Bakı Şəhəri Lokal Gəlirlər Departamentinin 7 avqust 2017-ci il tarixli gəlir vergisinin hesablanması haqqında qərarının ləğv edilməsini tələb edir.

Vergi Cinayətlərinin İbtidai Araşdırılması Departamenti avqustun 7-də "Turan" İnformasiya Agentliyinə qarşı cinayət işi açıb və ibtidai istintaqa başlayıb. Adıçəkilən departamentin qərarı başqa bir departamentin (Bakı Şəhəri Lokal Gəlirlər Departamenti) agentliyə 2014-cü ildən etibarən təxminən 27 min manat (16 200 dollar) əlavə gəlir vergisi, əlavə avans ödənişləri və faiz borcları ilə birlikdə isə 37 min manatdan çox borc hesablanması haqqında qərarına əsaslanır.