Bakıda iqlim dəyişikliyi və Çin müzakirə olundu – Fotolar

Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə keçirilən Qlobal Gənc Liderlər Forumu avqustun 23-də öz işini davam etdirib.

Teleqraf.com xəbər verir ki, Üçtərəfli Komissiyanın Avropa üzrə sabiq direktoru Paul Revayın moderatorluğu ilə gənc liderlərdən ibarət məşvərət qrupları təşkil olunub.

4-8 nəfərdən ibarət məşvərət qrupları müxtəlif mövzular ətrafında fikir mübadiləsi aparıblar. Həmçinin, Finlandiyanın sabiq prezidentinin baş məsləhətçisi Aira Kalela “İqlim dəyişikliyi ilə mübarizə, beynəlxalq əməkdaşlığın ən böyük problemi” mövzusunda təqdimatla çıxış edib.

Aira Kalela bildirib ki, iqlim dəyişikliyi tək ətraf mühiti korlamır. Həm də iqtisadiyyata, sənayeyə təsir göstərir. O, iqlim dəyişikliyinin özünü müxtəlif ölkələrdə müxtəlif cür büruzə verdiyini deyib. İqlim dəyişikliyinin ən çox Afrikaya təsir göstərdiyini, bölgədəki ərzaq, su çatışmazlığının bunun nəticəsi olduğunu diqqətə çatdırıb. Həmçinin, qlobal istiləşmənin qarşısının alınmasında Kioto protokolu və onun əhəmiyyətindən bəhs edib.

Daha sonra gənc liderlər iqlim dəyişikliyinə təsir göstərən problemlərin həlli ilə bağlı təkliflər irəli sürüb.

Məşvərət qruplarında müzakirələr günün ikinci yarısında da davam edib. Şvarzman Kollecinin icraçı direktoru David Panın moderatorluğu ilə keçirilən müzakirələrdə gənclər Çinin dünyada artan rolu haqqında fikir mübadiləsi aparıblar. David Pan bildirib ki, əvvəlki illərlə müqayisədə Çinin iqtisadiyyatı əhəmiyyətli dərəcədə güclənib, adambaşına düşən ümumdaxili məhsul son illərdə daha da artıb.

Son dövrlərdə texnologiya sahəsində baş verən yenilikləri xüsusilə vurğulayan D.Pan Çinin bu sahədə böyük pay sahibi olduğunu diqqətə çatdırıb. Gənc liderlər Çində investisiyanın daha çox yatırıldığı sahələr, Çinin müasir dövrdə yürütdüyü iqtisadi siyasət, Çin diasporunun müasir durumu, əlaqələri ilə bağlı məsələləri də müzakirə ediblər.

Müzakirələrdən sonra iştirakçılar təcrübə və fikir mübadiləsi aparıblar.