“Vəzifəliləri Konstitusiya oxumağa məcbur edin!” – Deputat

Artıq neçə gündür ayrı-ayrı insanlardan üzərimə xahişlər yağır. Bəlkə də son 20 gündə 20-yə yaxın tanışdan, dostdan, tanımadığım vətəndaşlardan müraciət alıram ki, uşağı birinci sinfə qəbul etmirlər. Bəhanə də budur ki, məktəbdə boş yer yoxdur. Yaxud da öncədən qeydiyyatdan keçməyib. Hələ litsey adlanan məktəblərdə 1-ci sinif uşaqları üçün sınaq imtahanı keçirilib, guya lazımi balı toplamadıqlarına görə məktəbə qəbul etmələri mümkün deyil.

Teleqraf.com xəbər verir ki, bu fikirləri Milli Məclisin deputatı Fazil Mustafa uşaqların birinci sinfə qəbulu haqda danışarkən qeyd edib.

Onun sözlərinə görə, məktəblərdə yerlə bağlı problemin olduğu, müəllimələrin sinfə götürəcəyi şagird sayı üçün limit qoyulması başadüşüləndir:

“Obyektiv çətinliklər var və bunu sadəcə həmin məktəblərin müdirlərinin üzərinə ittiham olaraq yönəltmək istəməzdim. İnsanlara kömək etmək də imkanım xaricindədir, çünki bütün günü məktəblərə məktub yazmalıyam ki, filan uşağı məktəbə götürmək sizin borcunuzdur, xahiş edirəm, borcunuzu yerinə yetirin. Ancaq bütün bunların həm də bir biabırçılıq tərəfi mövcuddur. Birinci sinfə gedən uşaq, ümumiyyətlə, niyə sınaq imtahanından və ya müsabiqəsindən keçməlidir? Azərbaycan Respublikasının Konstitusiyasının 42-ci maddəsi var. Yazılır ki, dövlət pulsuz icbari ümumi orta təhsil almaq hüququnu təmin edir. Uşaq evinə yaxın məktəbdə oxumaq istəyir, valideyn uşağını məktəbə qoymaq üçün niyə dağa-daşa düşməlidir? Əslində, biz dövlət olaraq cəhalətdən, kriminaldan qurtulmaq üçün vətəndaşa yalvarıb övladını məktəbə cəlb etmək əvəzinə, vətəndaş yalvarır ki, mənim uşağımı məktəbə götürün!”

Fazil Mustafa çıxış yolunu belə görür:

“Valideynlərin tək çıxış yolu var: evinizə yaxın köşkdən Azərbaycan Respublikasının Konstitusiyası yazılmış kitabçanı alıb onun 42-ci maddəsinin altından xətt çəkin və “sizin uşağı məktəbə götürə bilmərik” deyilən kimi istənilən vəzifəli şəxsi bu maddəni oxumağa məcbur edin! Yenə də bir nəticə ortaya çıxmasa, dərhal məhkəməyə müraciət edin. Narahat olmayın, məhkəmə mütləq xeyrinizə qərar çıxaracaq, çünki əks halda Konstitusiya pozulmuş olacaq. Neçə illərdir bizdə dərslər sentyabrın 15-də başladığına görə, gündəmdən sentyabrın 1-də qeyd etməyə alışdığımız Bilik günü və ya bayramı deyilən məfhum tamamilə yoxa çıxıb. Bu, əslində, məktəblərimizdən biliyi yoxa çıxarmaq üçün sanki unutdurulan bir tarixdir. Təhsilə gec başlamaq sübh tezdən günəş işığının 3-4 saatını yuxuda keçirməyə bənzəyən bir durumdur. İndi 1 sentyabrda yenə də məktəb olmayacaq, Bilik bayramı da olmayacaq, ancaq nə xoş ki, Qurban bayramı məhz həmin gün olacaq. Bu bayramın da fəlsəfəsi budur ki, yaradana şükr etmək üçün ona qurban kəsməlisən. Kəsəcəyin qurban da adamdan olmaz, mütləq bəlli heyvan cinsindən olmalıdır. Bu o deməkdir ki, adamdan qurban kəsilmirsə, onun təhsilini də, biliyini də nəyəsə, kiməsə qurban vermək olmaz! Odur ki, kimsə ilk başlanğıcdan körpə fidanlarımıza stress yaşatmasın, bütün səlahiyyətli şəxslər anlamalıdırlar ki, məktəbdə oxumağa başlamaq ali məktəbdə oxumaq deyil, dövlət tərəfindən təmin olunan hüquqdur!”