Vikipediyada növbəti erməni təxribatı – Vağzalı…

Niyə “Vağzalı” haqqında vikipediya məlumatında yalnız Aram Xaçaturyanın "Qayane" baletində "Qılınclarla rəqs"inin bir hissəsində “Vağzalı”nın melodiyasından istifadə etdiyi barədə məlumat verilib?..

Teleqraf.com xəbər verir ki, bu barədə aktyor Elnur Kərimov özünün Feysbuk səhifəsində yazıb.

Aktyor “Vağzalı” rəqsi ilə bağlı Azərbaycan dilində yazılmış vikipediya məlumatının qeyri-qənaətbəxş olduğuna işarə vurub.

Elnur Kərimov eyni zamanda bildirib ki, “Mirzəyi" rəqsi erməni rejissorların filmlərində səslənib deyə, vikipediyada bu barədə də məlumat əskini tapıb: “Məncə, araşdırılası və düzəlişə ehtiyacı olan mövzudur”.

Qeyd edək ki, 2013-cü il dekabrın 17-də Azərbaycan Respublikasının Prezident Administrasiyası Azərbaycan Milli Elmlər Akademiyasının (AMEA) Rəyasət Heyətinə "Vikipediya" virtual ensiklopediyası ilə bağlı məktub göndərib. Məktubda bu sahədəki problemlər qeyd edilib.

AMEA Rəyasət Heyəti 2014-cü il yanvarın 15-də bununla bağlı iclas keçirib.

İclasda qərara alınıb ki, AMEA-nın elmi müəssisə və təşkilatlarının rəhbərləri viki-mühitin Azərbaycanla bağlı zəruri məlumatlarla zənginləşdirilməsində, onların qorunması və inkişafında fəal iştirak etsinlər.

Elmi-tədqiqat müəssisələrində daimi fəaliyyət göstərən viki-qruplar təşkil olunsun, əhalinin viki-mühitdə gedən proseslər barədə maarifləndirilməsi, bu virtual məkanda aktiv fəaliyyətinin stimullaşdırılması üçün müvafiq tədbirlər görülsün.

Buna baxmayaraq, vikipediyada Azərbaycanla bağlı vəziyyət heç də ürəkaçan deyil.