Gömrükdə əməliyyat: Külli miqdarda pirotexniki vasitə tutuldu

Gəncə Gömrük İdarəsinin Gömrük hüquqpozmalarına qarşı mübarizə şöbəsinə Azərbaycanın gömrük ərazisinə gömrük qaydaları pozulmaqla pirotexniki vasitələrin gətirilməsinə dair daxil olan əməliyyat məlumatına əsasən şöbənin əməkdaşları tərəfindən "Volkswagen Bora" markalı avtomobil Şəmkir rayonu ərazisində saxlanılıb və Gəncə Gömrük İdarəsinin inzibati binasnın həyətinə gətirilən nəqliyyat vasitəsinə gömrük baxışı keçirilib.

Dövlət Gömrük Komitəsindən Teleqraf.com-a verilən məlumata görə, yoxlama zamanı Azərbaycan vətəndaşının idarə etdiyi nəqliyyat vasitəsinin ön buferininin altından, qabaq sol qapısının və yük yerində olan ehtiyat təkərin içərisindən üzərində "Petards K0201" sözləri yazılan 390 qutu, üzərində "Super Triangulos HF 606" sözləri yazılan 200 ədəd, üzərində "Black Devil Mega" sözləri yazılan 175 ədəd və üzərində "Zolja" sözləri yazılan 40 ədəd pirotexniki vasitə aşkar edilib.

Bundan başqa, Tovuz Gömrük İdarəsinin "Sınıq Körpü" gömrük postunda Gürcüstandan Azərbaycana gələn Azərbaycan vətəndaşının idarə etdiyi minik avtomobilinə baxış zamanı, nəqliyyat vasitəsinin salonunda və avtomobilin altında 444 qutu pirotexniki vasitə aşkarlanıb.

Hər iki faktla bağlı araşdırma aparılır.