Feysbuk messencerində yeni virus yayılır

Feysbuk sosial şəbəkəsinə məxsus messencerdə “Digmine” virus mayneri yayan yeni bot peyda olub. Artıq Cənubi Koreya, Vyetnam, Azərbaycan, Ukrayna, Tailand və Venesueladan olan istifadəçilər sözügedən zərərverici proqram təminatının qurbanı olublar.

Teleqraf.com "İctnyus"a istinadən xəbər verir ki, “Digmine” virusu Feysbuk messencerinin istənilən versiyasında işləyir, ancaq yalnız “Chrome” brauzeri qurulmuş fərdi kompüterləri yoluxdurur. Bot videoçarx bəhanəsi ilə istifadəçiyə zərərverici skriptə malik icra olunan fayl göndərir. Bu faylı başqa platformalarda (məsələn, smartfonda) işə salarkən virus işləmir.

Bundan başqa, Feysbuk hesabı üzrə sazlamalarda avtomatik avtorizasiya aktivləşdirilibsə, onda “Digmine” virusu nəzarəti ələ keçirərək zərərverici faylı bütün dostlara göndərməyə başlayır. Mütəxəssislər bildiriblər ki, hazırda virus maynerin funksionalı bununla məhdudlaşır, ancaq gələcəkdə onun hesablara müdaxilə edəcəyini istisna etmək olmaz. “Digmine” virusu yoluxdurulmuş kompüterləri “Monero” kriptovalyutasının mayninqi üçün istifadə edir.