Nazir yeni Aparat rəhbəri təyin etdi - Foto

Ayaz Əliyev İqtisadiyyat Nazirliyinin Aparat rəhbəri təyin edilib.

Teleqraf.com xəbər verir ki, Ayaz Əliyev 1974-cü ildə Mingəçevir şəhərində anadan olub.
Mingəçevir Politexnik İnstitutunun İqtisadiyyat və idarəetmə və Bakı Dövlət Universitetinin Hüquq fakültələrini bitirib. 1996-2001-ci illərdə Mingəçevir Politexnik İnstitutunda müəllim olub, 2001-2003-cü illərdə Bakı şəhəri üzrə Baş Vergilər İdarəsinin Vergi ödəyicilərinin auditinin təşkili şöbəsinin və Vergilər Nazirliyinin Daxili nəzarət baş idarəsinin Vergi orqanlarının fəaliyyətinə nəzarət şöbəsinin dövlət vergi müfəttişi vəzifələrində işləyib.

Ayaz Əliyev 2003-2008-ci illərdə Vergilər Nazirliyinin Daxili nəzarət baş idarəsinin Şəxsi heyətlə iş üzrə şöbəsinin, Daxili təhlükəsizlik baş idarəsinin Daxili audit şöbəsinin və Daxili audit baş idarəsinin Struktur bölmələrinin auditi şöbəsinin rəisi vəzifələrində çalışıb. Kiçik vergi xidməti müşaviri xüsusi rütbəsi var. 2008-2014-cü illərdə İqtisadiyyat və Sənaye Nazirliyinin aparatında şöbə müdiri vəzifəsində işləyib. Dövlət qulluğunun müşaviri ixtisas dərəcəsi vardır. 2014-cü ilin mart ayından İqtisadiyyat Nazirliyinin Aparat rəhbərinin müavini, 2017-ci ilin dekabrından Aparat rəhbəridir.

Azərbaycan Respublikası Prezidentinin Sərəncamı ilə 2012-ci ildə "Dövlət qulluğunda fərqlənməyə görə medalı" ilə təltif olunub.

Qeyd edək ki, bundan öncə İqtisadiyyat Nazirliyinin Aparat rəhbəri Samir Vəliyev Azərbaycan prezidenti İlham Əliyevin 22 dekabr 2017-ci il tarixli sərəncamı ilə energetika nazirinin müavini təyin edilib.