Bu körpüdən keçmək hər kəsə qismət olmur - Video

Qəbələnin Tikanlı kəndinin sakinləri Qəmərvan çayının üzərində salınan müvəqqəti körpüdən keçərkən sanki "tikan" üstündə keçməli olurlar.

Teleqraf.com xəbər verir ki, əhali şəhər mərkəzinə getmək üçün Qəmərvan çayının üzərində salınan müvəqqəti körpüdən istifadə edir.

Ancaq yayda su çox olduqda, qışda isə şaxta olduqda burdan istifadə təhlükəli hal alır. Sakinlər çarəni yük maşınlarına pul verib çayı keçməkdə tapıb. Şəhər mərkəzinə aparan alternativ yol isə 50 km uzundur.

Sakinlər ARB TV-yə deyib ki, sel gəlib bu körpünü aparır. Camaat əziyyət çəkir. İri maşınlarla gəlib-gedirlər:

“Qış olanda getmək olmur. Neçə dəfə yıxılıblar. Yaşlı adamlar keçə bilmir. Elə olur ki, gecə vaxtı ambulansı çağırırıq amma keçə bilmir. Yollar bərbaddır”.

Qəbələ rayon İcra Hakimiyyətindən verilən məlumata görə, çayın yatağı geniş olduğu üçün ərazidə böyük körpü salınmalıdır. Həmin körpünün layihəsi artıq hazırdır və tikintisi Dövlət proqramına salınıb.