İlahiyyatçı alimin yeni yaradılan İnstitutla bağlı - Şərhi

"Bu gün Prezident İlham Əliyev çox gözəl bir təsəbbüş göstərərək Azərbaycan İlahiyyat İnstitutunun yaradılması haqqında sərəncam verdi. Azərbaycan xalqı müxtəlif təzyiqlərə və təhdidlərə baxmayaraq, milli-mənəvi və dini dəyərlərini qoruyub, qoruyur və bundan sonra da qoruyacaq. Məhz bu gün Prezidentimizin atdığı bu gözəl addım bizə onu deməyə əsas verir ki, o, Ulu öndər Heydər Əliyevin miras qoyduğu gözəl bir yolu davam etdirərək milli-mənəvi və dini dəyərlərin bütün sahələrini öyrənmək üçün ali məktəb yaratdı".

Teleqraf.com xəbər verir ki, bunu ilahiyyat üzrə fəlsəfə doktoru, dosent Əkrəm Həsənov bildirib.

O deyib: "Artıq bizim ölkəmizə din sahəsində heç bir xarici dairə mənfi fikirlər aşılaya bilməyəcək. Düşünürəm ki, yeni yaradılan institutda ölkəmizin adət-ənənələri, milli-mənəvi dəyərləri, müxtəlif dinlər haqqında informasiyalar və islam dininin elmi şəkildə bütün dərinlikləri gənclərimizə öyrədiləcək. Əminəm ki, həmin institutu bitirən savadlı gənclər gələcəkdə ölkəmizdə din sahəsində yüksək ixtisaslı kadrlar olacaqlar. Bu institut Azərbaycan cəmiyyətinin mənəvi cəhətdən saflaşmasında mühüm rol oynayacaq. Fikrimcə, İlahiyyat İnstitutunda müxtəlif dinlər və islam dini ilə yanaşı, dinlər tarixi, islam tarixi, Azərbaycan tarixi, bir çox xarici dillər, fəlsəfə, fəlsəfə tarixi, kəlam, hədis, fiqh, dünyəvi elmlər, dövlətçilik, milli-mənəvi dəyərlərimizin tərkib hissəsi olan bütün vacib elmlər tədris olunacaq. Bu, gələcəkdə Azərbaycan tarixinə çox böyük faydalar verəcək. Həqiqət budur ki, məhz İlham Əliyevin bu möhtəşəm addımı Azərbaycan tarixində gələcək nəsillər üçün böyük hərflərlə yazılacaq. Mən inanıram ki, həmin institutu bitirən gənclər gələcəkdə dünya arxivlərində Azərbaycan həqiqətlərini üzə çıxararaq dünyaya təqdim edəcəklər. Biz, Azərbaycan alimləri Prezident İlham Əliyevə dərin təşəkkürümüzü bildiririk".