Xaricdən gələn zənglər təhlükəlidir, ehtiyatlı olun... – Video

Son günlər telefonuna tanımadığı xarici nömrədən zənglərin gəldiyini dəyən şəxslər var. Hətta hanısısa yükləmə və ya yeniləmə üçün bank hesablarından istifadə də təklif edilir. Bura Votsap və Feysbuk mesencerdən gələn təkliflər də daxildir. Buna maraq göstərən və inanan insanlara ya borc yazılır, ya da bank hesabından pul silinir. Ekpertlərin fikrincə, bu cür mesaj və zənglər dələduzluğun bir növüdür.

Teleqraf.com xəbər verir ki, ARB TV-nin “Günə doğru” verilişində xaricdən gələn zənglər barədə sujet yayımlanıb.

İKT üzrə mütəxəssis Cahid İsmayıloğlu bildirib:

“Bununla məşğul olan cinayətkarlar, qurbanı öz ölkələrindən yox, daha uzaq ölkələrdən seçirlər ki, məsuliyyətə cəlb olunmasında çətinlik olsun”.

Xüsusi proqram təminatı ilə bahalı tarif planı əsasında edilən zənglər, birbaşa istənilən ölkənin beynəlxalq kodu ilə həyata keçirilir. Və həmin nömrələrin heç bir qeydiyyatı belə olmur.

Cahid İsmayıloğlu (İKT üzrə mütəxəssis): “Həmin şəxslər xüsusi İP dəyişdirici vasitələrlə yerlərini gizlədərək, özlərini başqa ölkədəymiş kimi göstərərək hiyləyə əl atırlar. Ən çox Çin və Rusiyadan olur”.

Hüquqi cəhətdən bunun qarşısını almaq bir az çətin olsa da, mümkünsüz də deyil.

Vəkil Tahir Əlirzayev deyir ki, burada əsas məqsəd törədilən cinayətin hansı ölkədən qaynaqlandığını tapmaqdır: "Sonrası isə cinayət məcəlləsi ilə tənzimlənir".

Amma burada başqa nüanslar da var. Dəymiş zərər xüsusi həddə uyğun olmalıdır və zərərçəkənləri şikayətı zəruridir. Yalnız bundan sonra qanun çərçivəsində hərəkət etmək mümkündür.

Vəkil Tahir Əlirzayev: “Həmin ölkənin hüquq-mühafizə orqanlarına müraciət oluna bilər, həmin ölkədə o əməl cinayət hesab olunursa, tədbir görüləcək”.

Amma ən yaxşısı tanımadığımız və ya şübhə yaradacaq zənglərə mesaj formasında göndərilən linklərə daxil olmamaqdır. Kor-koranə hərəkət etməkdənsə, yaxşı olar ki, texnalogiyadan bildiyimiz qədər yararlanaq.