Metropolitenin mətbuat katibi: "Son stansiyaya çatdım..."

Bakı Metropoliteni QSC-nin mətbuat xidmətinin rəhbəri Nəsimi Paşayev mayın 31-də işdən ayrılacaq.

Teleqraf.com xəbər verir ki, o bu barədə özünün sosial şəbəkədiki səhifəsində yazıb:

"Hörmətli kütləvi informasiya vasitələri nümayəndələri, sevgili dostlar! 2014-cü ilin mart ayında mindiyim metro qatarı son stansiyaya çatdı. Təəssüf hissi ilə qeyd etməliyəm ki, mayın 31-də artıq bu stansiyada düşməliyəm.

Bu işə başlayarkən Bakı Metropoliteni QSC-nin sədri Zaur Hüseynovla uzun bir söhbət etdik. Dövlət başçısı tərəfindən böyük məsuliyyət yüklənmiş bu işi birlikdə çiyinlərimizdə daşımağa qərar verdik. Zaur müəllimin “Gəlin başlayaq. Şərt deyil ki, mən sizin işinizi bəyənim, bəlkə heç siz mənim iş prinsipimi bəyənməyəcəksiniz” sözləri məsuliyyətimi daha da artırdı.

Tam 4 il 3 ay çalışdıq. Biz bir komanda idik. Əsas məqsədimiz metromuzun imicini yüksəltmək, dünya metropolitenlərilə yarışacaq səviyyəyə gəlmək, yeni texnologiyaların tətbiqi və sair sahədə əlimizdən gələnin artığını etmək idi. Hər şey göz qabağındadır. Təbii ki, hər başlanğıcın bir sonu var. Mənim bu müddət ərzində necə fəaliyyət göstərdiyimin qiymətini siz verə bilərsiniz".

Nəsimi Paşayev hazırkı vəzifəsindən öz istəyilə getdiyni bildirib: "Başlanğıcda olduğu kimi, getmək haqqında qərarımı uzun söhbətdə müzakirə etdik. Zaur Hüseynov getmək istəyimə etiraz etsə də, qərarıma hörmətlə yanaşdı. “Bakı Metropoliteni sizə darlıq edir. Artıq siz daha böyük yerlərdə, daha böyük layihələrdə özünüzü sınamalısınız. Bizimlə böyük işlər gördünüz. Əminəm ki, bundan da böyük işlər görəcəksiniz” deyən sədr gələcək işlərimdə əlindən gələn köməkliyi göstərəcəyini bildirdib uğurlar arzuladı.

Gələcəkdə daha böyük layihələrdə, işlərdə görüşmək ümidi ilə!"