Türkiyə səfiri: "Əgər bu universitetdə qanunsuzluq olsa..." - Foto

Anadolu Universiteti Türkiyənin ən köklü və qədim, eləcə də dünyada ən çox tələbəsi olan universitetlərdən biridir.

Bu sözləri Türkiyənin Azərbaycandakı səfiri Erkan Özoral Azərbaycan mətbuatının 143 illiyi münasibətilə Anadolu Universitetinin Bakıdakı filialında keçirilən tədbirdə deyib.

Onun sözlərinə görə, bu tədris müəssisəsi distant təhsil aparan nüfuzlu ali məktəbdir və diplomları dünyada tanınır: "Distant təhsil fakültəsinin məzunları dünyanın dörd bir tərəfindədir. Anadolu Universiteti Türkiyənin və Azərbaycanın qanunlarına uyğun şəkildə fəaliyyət göstərir. Əgər hər hansı qanunsuzluq olsa, Təhsil Nazirliyi bizi məlumatdırar və biz də tədbir görərik. Bu ali məktəbdə Azərbaycan qanunvericiliyinə zidd fəaliyyətdən söhbət belə gedə bilməz. Bu universitetin xidmətlərindən gənclərin daha çox yararlanması üçün səfirlik əlindən gələni edir".

Anadolu Universitetinin rektoru Naci Gündoğan bildirib ki, Anadolu Universiteti 1957-ci ildən fəaliyyət göstərən dövlət ali məktəbidir. Onun sözlərinə görə, 1982-ci ildən etibarən burada distant təhsil aparılır: "İndiyədək 3 milyon məzunumuz olub, hazırda 2, 5 milyon tələbə Anadolu Universitetində təhsil alır. Təkcə azərbaycalılılar deyil, türk dilində danışan türkdillilər də universitetdə oxuya bilər. Bir ildir ki, Azərbaycanda ingilis dilində də tədris aparırıq".

Rektor əlavə edib ki, video-konfranslar vasitəsilə interaktiv dərslər keçirilir: "Texnologiya sərhədləri aşıb. Ali məktəbimiz Səudiyyə Ərəbistanı, ABŞ, Balkan ölkələri, 7 Avropa ölkəsində fəaliyyət göstərir. Türkcə danışılan hər yerdə varıq. 7 ildir universitetimizdə Heydər Əliyev bilik mərkəzi açılıb. Hər il ənənəvi olaraq Heydər Əliyevin doğum gününü həmin mərkəzdə qeyd edirik. Bu il Azərbaycan Cümhuriyyətinin 100 illiyi ilə bağlı üç gün konfrans keçirdik".

Rektor iki ölkə arasında dostluq əlaqələrindən də danışıb: "İki il əvvəl Türkiyə çətin vəziyyətdə olanda ilk olaraq Azərbaycandan dəstək aldı. Türkiyə də eyni dəstəyi verməyə hazırdır. Türkiyə ilə Azərbaycan, doğrudan da, bir millət, iki dövlətdir. Bu, təkcə sözdə yox, əməldə də özünü göstərir.Türkiyə Prezidenti Rəcəb Tayyib Ərdoğanın prezident seçildikdən sonra ilk rəsmi səfərini Azərbaycana etməsi bunun bariz nümunəsidir".

Daha sonra universitetin Əskişəhərdəki filialı ilə video bağlantı qurulub.

Distan təhsil fakültəsinin dekanı Yücəl Güney sözügedən tədris prosesi barədə geniş məlumat verib.

Onun sözlərinə görə, bakalavr təhsili 4 illik müddəti əhatə etsə də, universiteti 3 ilə də bitirmək mümkündür.