Vəkillər Kollegiyasından qalmaqallı yazı ilə bağlı açıqlama

Vəkillər Kollegiyası bu günlərdə bir sıra KİV-də və sosial şəbəkələrdə “Vahid siyasi məhbus siyahısı hazırlanıb” başlıqlı hesabat-yazıda qeyd olunanlarla bağlı açıqlama yayıb.

Kollegiyadan Teleqraf.com-a daxil olan məlumata görə, məlum yazıda qeyd olunan “Azərbaycanda vəkillərə qarşı repressiv siyasət aparılır, siyasi məhbuslara hüquqi yardım etmək üçün bir neçə vəkil qalıb, regionlarda müdafiə mexanizmlərinin olmaması ucbatından müdafiə təmin edilmir” ifadələr reallığı əks etdirmit.

"Eyni zamanda, adı çəkilən hesabatı və siyahını hazırlayan Vahid Siyasi Məhbus Siyahısı üzrə İşçi Qrupa daxil olan şəxslərin adları göstərilir ki, orada Azərbaycan Respublikasının Vəkillər Kollegiyasının üzvləri Əsabəli Mustafayev və Fariz Namazlının adları qeyd olunub. Bu yazı ilə bağlı Vəkillər Kollegiyası bildirir ki, həmin hesabatla Kollegiyanın “repressiv fəaliyyət”i barədə böhtan xarakterli məlumat verilməklə ictimaiyyətdə elə təsəvvür formalaşdırılmağa çalışılır ki, sanki vəkillər Əsabəli Mustafayev və Fariz Namazlı öz təmsil olunduqları qurumu fəaliyyətinə görə tənqid edirlər".

Azərbaycan Respublikasının Vəkillər Kollegiyası qeyd olunan hesabatı onun ünvanına atılmış böhtan olaraq qiymətləndirir və bildirir ki, vəkillər Fariz Namazlı və Əsabəli Mustafayev Vəkillər Kollegiyasının Rəyasət Heyətinə yazılı müraciət edərək, qeyd olunan İşçi Qrupun üzvü və hesabatın həmmüəllifləri olmadıqlarını, habelə hesabatda onların imzalarının olmadıqlarını qeyd ediblər. Hətta müraciət edərək adlarının da bu barədə məlumatlardan çıxarıldığını bildiriblər.

Vəkillər Kollegiyası təəssüf hissi ilə bildirir ki, hesabatın müəllifləri Vəkillər Kollegiyasının üzvlərinin adlarını İşçi Qrupun üzvləri sırasına daxil etməklə hesabata mötəbərlik xarakteri verməyə cəhd etmiş və Kollegiyanın üzvlərinin adından spekulyativ məqsədlə istifadə etməklə ictimaiyyəti və beynəlxalq təşkilatları çaşdırmağa çalışıblar.

Vəkillər Kollegiyası adı çəkilən hesabat müəlliflərinə qəti etiraz etməklə bu cür qanunsuz və saxta üsullara son qoymağa çağırır.

Azərbaycan Respublikasının Vəkillər Kollegiyası bəyan edir ki, Kollegiya bundan sonra da ölkə vətəndaşlarının yüksək keyfiyyətli hüquqi yardım almaq hüququnun həyata keçirilməsini və insan hüquq və azadlıqlarının etibarlı müdafiəsi üzrə fəaliyyətini ən yüksək peşəkar standartlara cavab verməklə davam etdirəcəkdir.