"Çıxış yolu sivil boşanmadır..." – Deputat/Müzakirə

Azərbaycan tarixən güclü, bir çox dünya ölkələrinə nümunə ola biləcək ailə dəyərlərinə sahib olub. Ancaq müasir informasiya texnologiyalarının inkişafı, dünyada yeni sosial münasibətlər sisteminin formalaşması, sənaye dövründən informasiya dövrünə keçid ölkəmizin mövcud ailə modelinə təsirsiz ötüşməyib.

Teleqraf.com xəbər verir ki, bu fikirləri “Qadın Liderliyi Uğrunda” İctimai Birliyin sədri Ülkər Abdullayeva “Klassik Azərbaycan ailə modelinin təbliği” layihəsi çərçivəsində keçirilən “Klassik, yoxsa müasir: Azərbaycanda ailə institutunun çağdaş problemləri” mövzusunda dəyirmi masada səsləndirib.

Onun sözlərinə görə, son illərin statistikasını izləyərkən məlum olur ki, ölkəmizdə nikahların sayı getdikcə azalsa da, boşanmaların sayı artır. Hadisələrin bu cür inkişafı informasiya dövrünün özü ilə gətirdiyi reallıqdır. Lakin bu, klassik ailə modellərinin sıradan çıxmasına və dolayısı ilə ailə institutunun sarsılmasına səbəb olur.

Ü.Abdullayeva bildirib ki, problemin aktuallığını nəzərə alaraq, rəhbərlik etdiyi təşkilat Prezident yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Klassik Azərbaycan ailə modelinin təbliği” layihəsini həyata keçirir. Dəyirmi masanı keçirməkdə də məqsəd ölkə ictimaiyyətinin diqqəyini cəmiyyətin vacib problemlərindən biri olan ailələrin hazırkı vəziyyətinə yönəltməkdir.

Layihə rəhbəri ailələrin dağılma səbəblərindən tutmuş uşaqlara alimentin ödənilməməsinə, ailədaxili zorakılıqları qədər ətraflı bəhs edib.

Tədbirdə çıxış edən millət vəkili Fazil Mustafa Azərbaycan ailələrində xeyli problemlərin olduğunu, onların üzərinə getməyin vacibliyini diqqətə çatdırıb. Millət vəkili iqtisadi cəhətdən təmin olunmamış qadınların ailələrdə böyük çətinliklərlə üzləşdiyinə diqqət çəkib. O, ailədə kişilərin üstünlük hüququ anlayışının kökündən yanlış olduğunu, ailələrin çoxunda əsəbi mühitin hökm sürdüyünü vurğulayıb.

Deputat ailədəki problemlərin daha ciddi nəticələrə gətirib çıxarmaması üçün sivil boşanmanın daha uyğun çıxış yolu olduğunu diqqətə çatdırıb.

Millət vəkili dövlətin ailələrlə bağlı sistemli addımlar atması lazım gəldiyini, qanunvericiliyə müvafiq əlavələrin edilməsinin vacibliyini, aliment fondunun yaradılması zəruriliyini qeyd edib.