"İRNA"nın baş direktoru Mətbuat Şurasında

Bu gün İranın nüfuzlu İRNA xəbər agentliyinin baş direktoru Seyyid Ziya Haşimi Mətbuat Şurasında (MŞ) olub.

Şuradan Teleqraf.com-a verilən məlumata görə, MŞ sədri, Milli Məclisin deputatı Əflatun Amaşov ona rəhbərlik etdiyi qurumun fəaliyyət istiqamətləri barədə məlumat verib.

Şuranın beynəlxalq əlaqələrinə toxunan Ə.Amaşov İranla bu baxımdan olan təmaslara diqqət çəkib. O, fikrini əsaslandırmaq üçün Mətbuat Şurası ilə İranın Mədəniyyət və İslam İrşadı Nazirliyinin Mətbuat və İnforamsiya Departamenti arasında 2016-cı ildə imzalanmış anlaşma memorandumunda nəzərdə tutulan müddəalardan söz açıb. Deputat sənədi əməkdaşlıq baxımından etibarlı «yol xəritəsi» kimi xarakterizə edərək bildirib ki, son zamanlar İran və Azərbaycanın media qurumları arasında əlaqələr güclənməkdədir.

MŞ İdarə Heyətinin üzvü, “İki sahil” qəzetinin baş redaktoru Vüqar Rəhimzadə iki ölkə arasındakı media əlaqələrinin inkişaf etdirilməsində İranın Azərbaycandakı səfirliyinin də müstəsna rolunun olduğunu bildirib, bu istiqamətdəki fikirlərini bölüşüb.

İRNA xəbər agentliyinin baş direktoru Seyyid Ziya Haşimi rəhbəri olduğu media orqanının hər zaman Azərbaycana böyük önəm verdiyini vurğulayıb. Mövcud dəst-xəttin davamlılığının zəruriliyini əsaslandıran baş direktor həmçinin media sahəsindəki ikitərəfli əlaqələrin müxtəlif tərəflərinə toxunub.

Görüşdə İran və Azərbaycan jurnalistlərinin qarşılıqlı səfərlərinin təşkili, Xəzər hövzəsi ölkələri jurnalistlərinin birgə toplantılarının keçirilməsində təşəbbüskarlıq, təcrübə mübadiləsi məsələləri ətraflı müzakirə olunub, qarşılıqlı maraq doğuran suallar cavablandırılıb.