Evini əcnəbiyə kirayə verən şəxs bilməlidir ki… - DMX rəisi

Dövlət Miqrasiya Xidmətinin (DMX) rəisi Vüsal Hüseynov əcnəbilərə kirayə ev verilməsi və ya DMX-nə müvafiq yaşama icazələrinin alınması ilə bağlı müraciət edərkən əcnəbinin qeydiyyata alınacağı yaşayış sahəsinin sənədi, yaşayış sahəsi verən şəxsin razılığı ilə bağlı bir neçə məqamı nəzərə çatdırıb.

Teleqraf.com xəbər verir ki, DMX rəisinin sözlərinə görə, birinci məqam odur ki, əcnəbilərə yaşayış sahəsi verən şəxslər bəzən onların müvəqqəti qeydiyyata alınmasına razılıqda tərəddüd edirlər: “Nəzərə alınmalıdır ki, əcnəbilər həmin yaşayış sahəsinə müvafiq yaşama icazəsinin etibarlılıq müddətində qeydiyyata alınır, yaşama icazəsinin etibarlılıq müddəti bitdiyi andan və ya yaşayış sahəsi verən şəxsin müraciət əsasında onların qeydiyyatı bitmiş olur. Yəni, əcnəbilərin həmin yaşayış sahələrinə həmişəlik qeydiyyatından söhbət getmir və belə qeydiyyat həmin yaşayıs sahəsi üzərində heç bir xüsusi imtiyaz yaratmır.

İkinci, DMX tərəfindən tələb edilən əcnəbinin qeydiyyata alınacağı yaşayış sahəsinin sənədi deyildikdə mülkiyyət hüququnun dövlət qeydiyyatına alınması haqqında daşınmaz əmlakın dövlət reyestrindən çıxarış, order, icarə (kirayə) müqaviləsi və ya qanunvericilikdə nəzərdə tutulmuş digər sənəd başa düşülür. Yəni, qanunvericlikdə qeydiyyat üçün yalnız daşınmaz əmlakın dövlət reyestrindən çıxarış (“kupça”) deyil, həmçinin yuxarıda göstərilən digər sənədlər də qəbul edilir.

Üçüncüsü, kirayə müqaviləsinə gəldikdə, həmin müqavilədə kirayəçi qismində müvəqqəti yaşama icazəsi almaq istəyən əcnəbi çıxış etməlidir. Kirayəçi başqa şəxs olduqda isə əcnəbinin qeydiyyatına yalnız o halda icazə verilir ki, kirayə müqaviləsində kirayəçiyə bu hüququn verldiyinə dair müddəa nəzərdə tutulmuş olsun”.