Əli Əhmədov gənclərə səsləndi: “Prezident sizinlə dialoqa böyük önəm verir” – Foto

Bu gün Yeni Azərbaycan Partiyasında gənclərlə görüş keçirilib.

Teleqraf.com xəbər verir ki, baş nazirin müavini, YAP-ın sədr müavini–icra katibi Əli Əhmədov görüşdə bildirib ki, Azərbaycan Prezidenti gənclərlə dialoqa böyük önəm verir:

“Bütövlükdə əhali ilə dialoqun qurulması Azərbaycanda həyata keçirilən siyasətin əsas istiqamətlərindən biridir. İnsanların arzu və istəklərini bilmədən onlara düzgün xidmət göstərmək çətin olar. Cənab Prezident çox tez-tez Azərbaycanın müxtəlif güşələrinə səfər edir və vətəndaşlarla görüşür, onlarla dialoq qurur ki, istək və arzularını öyrənsin və bunu həyata keçirilən siyasətdə nəzərə alsın”.

YAP sədrinin müavini qeyd edib ki, partiyanın sıralarında çoxlu sayda gənclər var:

“YAP-ın 700 mindən çox üzvünün əksəriyyəti gənclərdir. Hər il partiyaya 25-30 min arasında yeni üzvlər qəbul olunur və bu üzvlər arasında gənclər üstünlük təşkil edir”.

Ə.Əhmədovun sözlərinə görə, seçki kampaniyalarının uğurla baş tutmasına da gənclər böyük töhfələrini verirlər:

“Bütün bunların hamısı ondan xəbər verir ki, gənclər YAP-ın fəaliyyətinə dəstək verirlər. Bizim də gənclərdən gözləntilərimiz odur ki, yaxşı oxusunlar, biliklərə yiyələnsinlər, yaxşı mütəxəsislər olsunlar. Ən əsası gənclərimiz vətənpərvər olmalıdır, harda olmalarından asılı olmayaraq, vətənpərvərlik prinsipi əsasında davranmalıdırlar. Gənclər, eyni zamanda ictimai-siyasi həyatda da fəal olmalıdırlar, çünki bugünkü gənclər gələcək siyasətçilərdir, idarəedicilərdir”.

YAP-ın icra katibi vurğulayıb ki, partiya öz imkanları çərçivəsində gənclərə şərait yaradır ki, fəallıqlarını nümayiş etdirsinlər:

“2019-cu ilin dekabrında növbəti bələdiyyə seçkiləri keçiriləcək. Biz çalışacağıq ki, fəal gənclərimiz seçkidə namizəd qismində iştirak etsin və özlərini sınasınlar. Bununla da ölkənin ictimai-siyasi həyatında daha yaxından iştirak etmək imkanları əldə etsinlər”.