"Bir neçə insanın təqsirinə görə..." - Moskvadakı insidentə reaksiya

Çeçenlər və azərbaycanlılar əsrlər boyu dostluq edir və bir-birlərini dəstəkləyirlər.

Teleqraf.com xəbər verir ki, bunu Orenburq vilayətinin Akbulak rayonundakı “Kirova” MMC kənd təsərrüfatı müəssisələrinin rəhbəri Sayd-Husen Maqomadov Azərtac-a bildirib.

O qeyd edib ki, Orenburqda çeçen və Azərbaycan diasporları birgə tədbirlər həyata keçirir, milli bayramları birlikdə qeyd edirlər. S.Maqomadov deyib: “Bizi ortaq tarix, dini, mədəni və qohumluq əlaqələri birləşdirir. Orenburq vilayətindəki Azərbaycan diasporunun rəhbəri Yaşar Məsimov bizi bütün tədbirlərə dəvət edir. Biz daim bir-birimizi dəstəkləyir, bir masa arxasında toplaşır və çörəyimizi paylaşırıq”.

Orenburqdakı çeçen diasporunun nümayəndəsi Moskvada çeçenlər və azərbaycanlılar arasında son hadisələri “təxribat” adlandırıb. “Kimin haqlı, kimin günahkar olduğuna yalnız hüquq-mühafizə orqanları qiymət verməlidirlər. Hesab edirəm ki, bir neçə insanın təqsirinə görə bütöv xalqları qarşı-qarşıya qoymaq, adi bir hadisəni şişirtmək doğru deyil”,- deyə o vurğulayıb.