DİM növbəti imtahanlar keçirir

Martın 31-də Dövlət İmtahan Mərkəzi tərəfindən imtahanlar keçirilir.

Teleqraf.com-un Dövlət İmtahan Mərkəzinə istinadən verdiyi məlumata görə, imtahanlar bütün binalarda eyni vaxtda saat 11:00-da başlayır. İmtahanlar ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları, əvvəlki illərdə təhsil sənədi ala bilməyən və eksternat qaydasında imtahan verən məzunlar, üzrlü səbəbdən bu ay keçirilən buraxılış imtahanlarının (IX sinif) birinci mərhələsində iştirak edə bilməyən cari ilin məzunları, orta ixtisas təhsili müəssisələrinin müsabiqəsində orta məktəbdə təhsil aldıqları bölmədən fərqli bölmə üzrə iştirak etmək istəyən Azərbaycan və ya rus dili fənni üzrə imtahanı verən cari ilin məzunları, orta ixtisas təhsili müəssisələrinin müsabiqəsində buraxılış imtahanı çərçivəsində verilən xarici dil fənnindən fərqli xarici dil fənni üzrə iştirak etmək istəyən cari ilin məzunları üçün keçirilir.

İmtahanlar Bakı,Naxçıvan, Gəncə, Şəki, Yevlax, Bərdə, Göyçay, Şirvan, Xaçmaz və Lənkəran şəhərlərində təşkil olunur. İmtahanda 7761 (Bakıda 2158, Naxçıvanda 403, Gəncədə 1147, Şəkidə 373, Bərdədə 919, Göyçayda 499, Şirvanda 780, Lənkəranda 840, Xaçmazda 491) nəfərin iştirakı nəzərdə tutulur.