“Stadiona Azərbaycan bayrağı ilə getmək təklifini…” – Əli Əhmədov

May ayının 29-da Bakının Olimpiya Stadionunda Avropa Liqasının final oyunu keçiriləcək. Avropanın iki məşhur futbol komandasının – “Arsenal” və “Çelsi” komandalarının çempionluq uğrunda yarışına Bakının ev sahibliyi etməsi əlamətdar hadisədir. Bu, təkcə idman bayramı deyil, eyni zamanda Azərbaycanı, Bakını tanıtmağın gözəl imkanıdır. Artıq bir neçə gündür Bakı, Azərbaycan futbolsevərlərin ən çox müzakirə etdiyi ölkə və şəhərdir. Ayın 29-da isə bütün dünyanın nəzərləri Bakıda olacaq.

Teleqraf.com xəbər verir ki, bunu Baş nazirin müavini, YAP sədrinin müavini və icra katibi Əli Əhmədov sosial şəbəkə hesabında bildirib.

O, yazıb:

“İdmançılara uğurlar diləyirəm. Komandalardan hansısa çempion adına məhz Bakıda nail olduğunu heç zaman unutmayacaq. Eynilə də fanatların Bakıda keçirilən oyundan ən xoş təəssüratlarla qayıdacaqlarına əminəm.

Bakıdakı futbol fanatlarının oyuna Azərbaycan bayrağı ilə getmək barədə sosial şəbəkələrdə səsləndirilən təklifi mən də dəstəkləyirəm. Yaxşı olar ki, Bakı həm oyunçuların, həm də fanatların yaddaşında təkcə stadionun gözəlliyi ilə deyil, həm də azarkeşlərin coşqusu ilə qalsın. Azərbaycan bayraqları, Azərbaycan coşqusu və Azərbaycan qonaqpərvərliyi ilə futbolçuları və onların Bakıya gəlmiş fanatlarını salamlayırıq. Hamınıza gözəl idman həyəcanı və xoş istirahət arzulayıram”.