Abşeronda sahibsiz itlər sakinləri qorxuya saldı – İH-dən açıqlama

Ölkə ərazisində, şəhər ətrafı bir çox yerlərdə, hətta parklarda xeyli sayda sahibsiz itlərə rast gəlinir.

Teleqraf.com xəbər verir ki, Abşeron rayonu Yeni Bakı Yaşayış kompleksi sakinləri sahibsiz itlərin çoxluğundan şikayət edirlər.

Onların sözlərinə görə, kompleksə köçdükləri vaxtdan bəri ərazidə küçə itlərinin sayı durmadan artmaqdadır. Ötən gün isə azyaşlı uşağın üzərinə itlərin hücum etməsi onları ayağa qaldırıb. Sakinlər bildirirlər ki, itlər xüsusilə zibil qutuları ətrafında toplanırlar. Onların sözlərinə görə, İcra hakimiyyətinə müraciət etsələr də, nəticə dəyişməyib.

Abşeron Rayon İcra Hakimiyyətindən Teleqraf.com-a bildirilib ki, belə bir fakt barədə məlumatlı deyillər: “Bununla bağlı bizə məlumat daxil olmayıb. Məsələni araşdıracağıq”.

Balaxanı qəsəbəsində fəaliyyət göstərən “Toplan” sahibsiz itlərə qayğı mərkəzindən bildirildiyinə görə, onlar yalnız Bakı daxilində sahibsiz itlərə nəzarət edirlər: “Ötən il tikintisinə başlanan Abşeron rayonu üzrə Pirəkəşkül qəsəbəsindəki sığınacağın bu ilin sonuna qədər istifadəyə verilməsi nəzərdə tutulur”.