Qəbul imtahanları: Müzakirə gedir, qərar elan olunacaq - Açıqlama

İmtahanlarla bağlı DİM-lə Təhsil Nazirliyi arasında mütəmadi müzakirələr aparılır. İmtahanların keçirilməsi istiqamətində planlar hazırlanır. Qərarlar yaxın zamanda elan olunacaq.

Teleqraf.com xəbər verir ki, bunu Təhsil Naziri Ceyhun Bayramov Operativ Qərargahın brifinqində deyib.

O qeyd edib ki, ali təhsil müəssisələrinin rektorları ilə görüş keçirilib: "Yaz sessiyasının qiymətləndirilməsi ilə əlaqədar müzakirələr aparılır, təkliflər hazırlanır. Bu barədə ilkin olaraq Baş Nazirlə müzakirələr həyata keçirilib".

Müəllimlərin işə qəbulundan danışan Ceyhun Bayramovun sözlərinə görə, proses 3 mərhələyə bölünür: "Daimiləşmə, yer dəyişmə və yeni işə qəbul prosesi. Yalnız bir müsahibə mərhələsi var və bunun onlayn şəkildə həyata keçirilməsi üzərində iş aparılır.

Eyni zamanda yerdəyişmə prosesi iyun ayında, işə qəbul isə iyul ayında həyata keçiriləcək. Yeni normaları nəzərə almaqla, bu istiqamətdə işlər aparılır".