"Pandemiya təhlükəsi yenidən qayıda bilər" - Millət vəkili

Karantin qaydalarının yumşaldılması Nazirlər Kabineti yanında Operativ Qərargahın qərarlarına əsasən, icra olunur. Qeyd etmək istəyirəm ki, Operativ Qərargah professional şəkildə pandemiya ilə mübarizə tədbirlərinin öhdəsindən gəlir. Xüsusi karantin rejiminin tətbiqi, bir çox sahələrdə məhdudiyyətlərin qoyulması pandemiya üzərində qələbəyə doğru addımlamağımıza imkan verdi. Artıq karantin rejimində yumşaldıcı tədbirlər həyata keçirilir. Bir çox sahələrdə fəaliyyət bərpa olunur və həyat öz axarına qayıtmaq istiqamətindədir.

Bunu Teleqraf.com-a açıqlamasında millət vəkili Azər Badamov deyib.

O bildirib ki, karantin rejiminin yumuşaldılması sağalanların sayının yoluxanların sayını üstələməsi ilə bağlıdır: "İlkin nəticələr müsbətdir və yavaş-yavaş qarşımıza qoyulmuş hədəfə yaxınlaşmaq üzrəyik. Karantin rejimində yumşalmaların davamlı olması birinci növbədə insanlardan asıllıdır. Əgər biz desək ki, artıq koronavirus pandemiyasının təhlükəsi sovuşmuşdur, bu yalan olar. Çünki, hələ də cəmiyyətdə yeni yoluxmalar mövcuddur. Biz onda tam yumşalmaya gedə bilərik ki, 2-3 həftə ərzində ölkəmizdə yeni yoluxmalar olmasın. Təbii ki, növbəti yumşalmalar hansı sahələrdə olmalıdır və nə qədər biz yumşalmaya getməliyiksə, bunu Operativ Qərargah müəyyən edəcəkdir. Çünki, qərargah gündəlik ölkədəki pandemiyayla bağlı vəziyyəti təhlil edir və ona uyğun düzgün qərarlar qəbul edir".

Azər Badamov qeyd edib ki, dövlətimiz insanların sağlamlığının qorunması və pandemiya ilə mübarizə üçün bütün resurslarını işə salıb:

"Amma bu o demək deyil ki, ancaq dövlətin gücü bu bəlaya qarşı mübarizədə yetərlidir. Təbii ki, bu mübarizənin əsas iştirakçıları vətəndaşlardır. Əgər vətəndaşlar axıra qədər Operativ Qərargahın tövsiyə və tapşırıqlarına əməl etməsə, pandemiya təhlükəsi yenidən daha kəskin şəkildə qayıda bilər. Tələblərə riayət etməyən insanlara inzibati qaydada cəzalar tətbiq olunur. Biz birdəfəlik bilməliyik ki, dövlətin bütün tədbirləri bizim sağlamlığımız üçündür. Ona görə də son gününə qədər hamı Operativ Qərargahın tələblərinə əməl etməyə borcludur. Dövlətimiz həm pandemiya ilə mübarizə aparır, həm də postpandemiya dövrünə hazırlıq görür. Bununla əlaqədar geniş tədbirlər planı, proqramları icra olunur. Düşünürəm ki, biz bu bəşəri sınaqdan da az itkilərlə çıxan ölkələrin sırasında olcağıq. Pandemiyaya qalib gəlmək üçün həmrəylik davamlı olmalıdır. Biz birlikdə güclüyük".