Madonna mitinqə qoltuq ağacı ilə qatıldı - Foto

Amerika vətəndaşı Corc Floydun polis tərəfindən öldürülməsinə etiraz olaraq aksiyalar davam edir.

Teleqraf.com xəbər verir ki, 2 gün əvvəl Londonda keçirilən aksiyaya dünyaca məşhur müğənni Madonna da qatılıb.

Bir həftə əvvəl dizindəki zədəyə görə xəstəxanaların birində müalicə alan sənətçinin mitinqdə qoltuq ağacından istifadə etməsi diqqət çəkib. Yürüyüş zamanı 61 yaşlı Madonnanın yanında 2 cangüdəni də olub.

Mitinqdə iştirak edən insanlar arasında müğənni ilə şəkil çəkdirənlər də olub.

Qeyd edək ki, mayın 25-də Minneapolisdə Corc (George) Floyd polis əməkdaşlarının ittiham olunduğu bir hadisə zamanı qətlə yetirilib. İnternetdə yayılan görüntülərdə 3 polisin Floydun qollarını qandallayıb onu yerə yıxdıqları və üstünə oturaraq yerə sıxdıqları, onlardan birinin isə dizini boğazına basdığı nəzərə çarpır. Bir neçə dəfə “nəfəsim daralır” deyən Floyd sonra hərəkətsiz qalır. Xəstəxanaya çatdırılan zərərçəkən orada dünyasını dəyişib.