8 İyul 2020 14:51
748
12 Punto 14 Punto 16 Punto 18 Punto

ABŞ yeni növ koronavirus (COVID-19) peyvəndi hazırlamaq üçün “Novavax” dərman şirkətinə 1.6 milyard dollar ödəyəcək.

Teleqraf.com xəbər verir ki, hökumət bu məbləği 100 milyon doza vaksini istehsal edilməsi qarşılığında gələn ilin əvvəlində şirkətin hesabına köçürəcək.

Müqavilə ABŞ Prezidenti Donald Trampın il sonuna qədər koronavirus peyvəndi tapacağına dair vədini yerinə yetirmək məqsədi ilə yaradılmış "Warp Speed" adlı layihə çərçivəsində bağlanıb.

“Novavax” şirkəti büdcənin bütün sınaq addımlarını və istehsal prosesini əhatə etdiyini bildirib. ABŞ hökuməti ilə razılığa əsasən, şirkət ilin sonuna qədər klinik sınaqların nəticələrini gözləmədən peyvənd istehsalına başlaya biləcək. Koronavirus peyvəndinin təhlükəsiz və təsirli olduğu təsdiqlənərsə, dərman firması 2021-ci ilin ilk rübündə 50 milyon insan üçün 100 milyon dozada çatmağı öhdəsinə götürüb.

“Novavax” meneceri Stanley Erck birinci fazalı sınaqların gələn həftə başlayacağını və üçüncü fazalı idarəetmə təcrübələrinin oktyabrda fokuslanacağını açıqlayıb.

ABŞ Səhiyyə və Sosial Xidmətlər naziri Aleks Azar bildirib ki, "Novavax”ın “Warp Speed” ​​əməliyyatının peyvəndlərin şaxələndirilməsi portfelinə əlavə edilməsi, bu ilin sonunda mümkün qədər tez təhlükəsiz və effektiv bir peyvənd əldə etmək şansımızı artırır.

Qeyd edək ki, “Novavax” Amerika ordusunu koronavirusdan qorumaq üçün iyun ayında Müdafiə Nazirliyinə 10 milyon doza peyvənd istehsal edəcəyinə dair söz verib və bunun qarşılığında 60 milyon dollarlıq müqavilə imzalayıb.

“Warp Speed” layihəsi çərçivəsində hazırladığı vaksinin oktyabr ayında hazır ola biləcəyini söyləyən İngilis dərman şirkəti “Astra Zeneca”ya da 1.2 milyard dollar federal yardım verilib.

Bundan əlavə, “Johnson & Johnson”, “Sanofi”, “Moderna Therapeutics” və “Merck” adlı 4 şirkət də Amerika hökumətindən peyvənd almaq üçün federal yardım alan şirkətlər sırasındadır.


Müəllif: Yeganə Oqtayqızı