4 Avqust 11:02
743

“Bəzilərimizə dəniz yox, çimərlik mövzusunda söz güləşdirmək, hər şeyə bir "mız" qoymaq lazım imiş”.

Teleqraf.com xəbər verir ki, bunu "Bakı Xəbər" qəzetinin baş redaktoru Aydın Quliyev deyib.

O qeyd edib ki, camaat az qalmışdı məşhur müğənninin "Mənə dəniz verin" mahnısını küçələrdə, evlərdə, parklarda ucadan oxutdurub azarını öldürsün:

“Ancaq bu gün bəzi əsas karantin məhdudiyyətləri aradan qaldırıldı - SMS icazə olmayacaq, az qala "mənə dəniz verin" deyərək ün təpənlər üçünsə çimərliklər açıldı. Düz 120 çimərliyə əsaslı şəkildə əl gəzdirilib, yüzlərlə könüllü bu işə cəlb edilib. Görünən odur ki, hamı dənizin açılmasını gözlədiyi müddətdə əlaqədar insanlar işləyiblər, dənizi olan ölkələrin pandemiya şəraiti üçün münasib bildikləri çimərlik qaydalarını öyrəniblər. Ancaq bu da görsənir ki, bizlərdən bəzilərimizə dəniz yox, çimərlik mövzusunda söz güləşdirmək, hər şeyə bir "mız" qoymaq lazım imiş.

Bəziləri indi də başlayıb ki, bəs gözləyib-gözləyib çimərlikləri bu sərin düşən vaxt niyə açdılar?! Yox, daha bu oldu "dənizin ortasında xoruz toz eləmə" məsələsi kimi. Bu, təbiətdir, onu kim idarə edə bilir ki? İndiyədək avqustun belə sərin keçdiyini heç xatırlayan var? Kim bilir ki, iki-üç gün sonra hava birdən-birə 40-45 dərəcəyə qalxmayacaq? O zaman o dəniz, o da siz...”

Aydın Quliyev bildirib ki, bəziləri çimərlik məhdudiyyətini qaldırmağın vacib saymır, əvvəlcə rayonlara gediş-gəlişin bərpa edilməli olduğunu vurğulayır:

“Rayonlara gediş açılmış olsaydı, yəqin bu dəfə də deyəcəkdilər ki, dəniz daha vacib idi. Hər ağızdan çıxan avazı bir yerə yığıb qərar vermək lazım gəlsəydi, yəqin ki, bütün pandemiya məhdudiyyətləri birdən aradan qaldırılmalı idi. Bu da o demək olacaqdı ki, pandemiya təhlükəsi büsbütün silinib getməmiş biz bütün karantin qadağalarından imtina edirik.

Dünyada pandemiyanın ikinci, üçüncü dalğasının başladığı ölkələr var ikən bu, doğrumu olardı? Sözüm bəzi heç özü də nə istədiyini bilməyənlərədir - "Axı sən nə istəyirsən?" Dəniz deyirdik, oldu, bir azdan rayonların da yolları açılacaq, hər şeyin öz vaxtı və növbəsi var, darqursaq olmayaq.

Pislədiyimiz o məmurların bir çoxunun istirahət mərkəzləri, kafe-restoranları, əyləncə mərkəzləri elə rayonlardadı, onlar da yolların açılmasında maraqlıdır. Ancaq məsələ kimlərinsə marağına görə yox, hamının, cəmiyyətin mənafeyinə görə qərarlaşdırılır. Bütün məhdudiyyətlərin götürülməsinə imkan verən şəraiti biz özümüz də mümkün qədər yaxınlaşdırmağa çalışmalıyıq. Şəxsi gigiyena və məsafə saxlamaqla. Dənizin ardınca rayonlar gəlir”.


Müəllif: Yeganə Oqtayqızı