AMEA-nın professoru vəfat etdi

Azərbaycan Milli Elmlər Akademiyası (AMEA) Folklor İnstitutunun Folklor və yazılı ədəbiyyat şöbəsinin müdiri, filologiya elmləri doktoru, professor Kamran Əliyev dünyasını dəyişib.

Teleqraf.com xəbər verir ki, bu barədə AMEA Folklor İnstitutunun aparıcı elmi işçisi, filologiya üzrə fəlsəfə doktoru Elyar İslamoğlu bildirib.

Kamran Əliyev martın 5-i 1953-cü ildə Naxçıvanın Şərur rayonunun Diyadin kəndində anadan olub. 1974-cü ildə Azərbaycan Dövlət Universitetinin filologiya fakültəsini fərqlənmə diplomu ilə bitirib. 1976-1979-cu illərdə Azərbaycan Milli Elmlər Akademiyasının aspirantı olub.

1980-ci ildə “XX əsr Azərbaycan romantiklərinin ədəbi-nəzəri görüşləri” mövzusunda namizədlik dissertasiyasını müdafiə edərək, filologiya elmləri namizədi elmi dərəcəsi, 1990-cı ildə “XX əsr Azərbaycan romantizminin obrazlar sistemi” mövzusunda doktorluq dissertasiyası müdafiə edərək, filologiya elmləri doktoru elmi dərəcəsi alıb.

2010-cu ildə isə professor elmi adı alıb.

2012-ci ildən Folklor və yazılı ədəbiyyat şöbəsinin müdiri işləyən Kamran Əliyev 2017-ci il mayın 2-də AMEA-nın müxbir üzvü seçilib.