Azərbaycanda gənc təlimçilərin məlumat bankı yaradılır

Gənclər üçün Təhsil Mərkəzi Gənclər və İdman Nazirliyinin dəstəyi ilə gənc təlimçilərin məlumat bankının yaradılmasına başlayır.

Mərkəzdən Teleqraf.com-a verilən məlumata görə, bir neçə mərhələdən ibarət olan layihənin əsas məqsədi gənc təlimçilər haqqında vahid informasiya bazasının qurulmasına, onların şəbəkələşməsinə, gənclər arasında qeyri-formal təhsil metodologiyasının təşviq olunmasına və təlimçilik bacarıqlarının inkişaf etdirilməsinə dəstək verməkdir.

Yaradılacaq məlumat bankında Azərbaycanda fəaliyyət göstərən hər bir təlimçi, onun keçirdiyi təlimlərin mövzuları və digər informasiyalar yerləşdiriləcəkdir. Mərkəz ölkənin bütün şəhər və rayonlarından bu məlumatların toplanması üçün xüsusi sorğu blankları hazırlanıb.

Qeyd edək ki, məlumat bankının ilin sonuna qədər tam hazırlanması və ictimaiyyətə təqdim olunması planlaşdırılır.

BƏXTİYAR