Şöbə müdiri: "Sabahdan birinci sinfə yalnız onlayn qeydiyyat olacaq"

Aprelin 27-dən etibarən ümumtəhsil müəssisələrində saat 11:00-dan etibarən birinci sinfə onlayn qeydiyyat başlayır.

Teleqraf.com xəbər verir ki, bunu Təhsil Nazirliyinin şöbə müdirinin müavini Orxan Abbasov birinci sinifə qəbulla bağlı keçirilən onlayn brifinqdə deyib.

Onun sözlərinə görə, sabahdan etibarən Respublika İncəsənət Gimnaziyasının, Bülbül adına orta məktəbin ixtisasları üzrə birinci sinfə qəbul başlayır:

"Bəzən qeydiyyat və məktəb seçimi ilə bağlı anlaşılmazlıq olur. Sabah yalnız onlayn qeydiyyat sistemi açılır. 29 apreldən isə məktəb seçimi başlayacaq. Təhsil Nazirliyi tərəfindən birinci siniflərə qəbul mektebeqebul.edu.az portalı vasitəsilə həyata keçirilir. Bu portal istifadəçilərin istifadəsi üçün daha sadə olması üçün təkmilləşdirilir. Bakı Şəhəri üzrə Təhsil İdarəsi və digər rayon şöbələrində müvafiq işlər həyata keçirilir. Bütün hazırlıq işləri yekunlaşıb".