Komitə sədri şəhid olan jurnalistlər haqda: "Vətənimin fədakar oğulları..."

Hər ikisini də coxdan tanıyırdım, xüsusilə Siracı. İlk dəfə ünsiyyətdə olduqdan sonra cox maraqlı təəssürat oyatmışdı məndə. Zahiri görünüşü ilə tam ziddiyyət təşkil edən xarakteri olduğunu dərhal hiss etmişdim. Adətən, coxsaylı media təmsilciləri ilə, xüsusilə tədbir öncəsi və sonrası ayaqüstü görüşlərdə kimin kim olduğunu və hansı media qurumunu təmsil etdiyini yadda saxlamaq çətin olur mənim ücün. Amma bunu Siraca aid edə bilmərəm. Öz işinə çox məsuliyyətlə yanaşdığı hərəkətlərindən bəlli, pəhləvan cüssəli, sakit təbiətli, simasında ildırım effektli təbəssümü ilə zahirən çox ciddi, xaraktercə çox mülayim bu qaraqabaq oğlanı hec kimlə səhv salmaq mümkün deyildi.

Bu fikirləri Teleqraf.com-a Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib.

O qeyd edib ki, son dəfə onu hörmətli Yunis Orucovun işğal olunmuş ərazilərdə Məhərrəmlə birgə apardığı cəkilişlərlə bağlı hazırladığı jurnalist araşdırmasında izləmişdim:

“Kamerası ilə yanaşı dayanmışdı. Ən yaxın sirdaşı kimi məhz onun obyektivindən 50 milyon azərbaycanlının gözüylə işğaldan azad olunmuş ərazilərə baxdığını söyləyəndə isə gördüklərinin onu necə sarsıtdığını səsinin titrəyişindən duymuşdum. Cünki bütün ev-eşiyindən didərgin düşmüş insanların daxili təlatümləri, kecirdikləri hiss-həyəcan mənə yaxşı tanışdır. Hətta onları şəxsən tanımasam belə bu mövzuda bir neçə kəlmə söyləməsi kifayət edir ki, onun mənəvi durumu mənə aydın olsun”.

Komitə sədri deyib ki, Sirac isə həmin o filmdə təkcə bizim gözümüzlə baxan deyil, həm də gördüklərindən bizim hamımızın yerinə sevinc, qəzəb, təəssüf, eyni zananda qürur hissi kecirən biri olduğunu bu bir neçə kəlməsində izhar etmişdi:

“İndi Sirac da Məhərrəm də haqq dünyasındadırlar. Özlərindən sonra isə kameranın yaddaşına köcürdükləri erməni barbarlığının izləri, insanlığın üz qarası olan faşizmin eybəcər simasını sübut edən faktlar, həmçinin yaxınları və doğmalarına, eləcə də bizə əmanət etdiyi yadigarları qaldı...Vətənimin fədakar oğulları, bilin ki, dövlətimiz və xalqımız bütün Şəhidlərimizin xatirəsini hər zaman əziz tutacaq”.

Bahar Muradova görə, müharibə bitdikdən sonra belə can almaqda davam edən düşmən öz layiqli cəzasını alacaq:

“Sizin zəhmətiniz və fədakarlığınızla əldə edilən faktlar isə təkzibedilməz dəlil və sübut qismində insanlıq əleyhinə cinayətlər törətmiş canilərə qarşı ittiham aktında yer alacaqdır. Uğrunda canınızı fəda etdiyiniz Vətən torpağında nur içində yatın!”.