Azərbaycanda Kompüter Oyunları üzrə Dünya Çempionatı

Azərbaycanda Kompüter Oyunları üzrə VI Dünya Çempionatı (6-th e-Sport World Championship BAKU) işə başlayır. Ölkəmizdə ilk dəfə keçirilən çempionat noyabrın 17-dək davam edəcək. Beynəlxalq Kiber İdman Federasiyasının (himayəsi altında dünya kiber idmançılarını bir araya gətirən möhtəşəm tədbir “Crystall Hall”-da təşkil olunub.

Tədbirlə əlaqədar qaydalar və əsas müddəalar Kompüter Oyunları üzrə 6-cı Dünya Çempionatının Bakıda təşkili ilə bağlı imzalanmış memorandumda əksini tapıb. Oyun nizamnaməsinin rəsmi qaydalarına uyğun olaraq, Beynəlxalq Kiber İdman Federasiyasının (IeSF) Təşkilat Komitəsi yarışların kişilər və qadınlar arasında iki növ üzrə keçirilməsini təmin edir. Çempionata ev sahibliyi edən ölkənin isə əlavə 3-4 növə namizədliyini irəli sürmək hüququ var.

Kişilər arasında oyunlara əvvəllər yalnız qadınlar üçün nəzərdə tutulmuş
“Tekken Tag Tournament 2” növü də əlavə olunub. Beləliklə, aşağıda sadalanan növlərdə həm qadınlar, həm də kişilər iştirak edə bilərlər.

“DOTA 2” (komanda eyni vaxtda qadın və kişilərdən ibarət ola bilər);
“StarCraftII: Heart of the Swarm”;
“Super Street Fighter 4”;
“Hearthstone: Heroes of Warcraft”;
“Tekken Tag Tournament 2”.
Yalnız qadınların qatıla biləcəyi növlər:
“StarCraftII: Heart of the Swarm”;
“Tekken Tag Tournament 2”.


“DOTA 2” növü üzrə oyunlarda xanımlar da iştirak edə bilərlər və bu növ üzrə ehtiyat oyunçuların sayı 3-ə yüksəldilib. Azərbaycan oyunçularının iştirakına gəlincə, Dünya Çempionatında ölkəmizə 5 yer ayrılıb.

Azərbaycan idmançıları finalda fərdi “Tekken Tag Tournament 2”, “Starcraft 2”, “Hearth Stone”, “Super Street Fighter IV” növləri, komanda yarışlarında isə “Dota 2” (5x5) növündə təmsil edəcəklər.

Qaliblərin mükafatlandırılmasına gəldikdə, Kompüter Oyunları üzrə 6-cı Dünya Çempionatında “IeSF”-in tarixi ərzində ən böyük mükafat fondu (100. 000 ABŞ dolları) müəyyən edilib.

Qeyd edək ki, çempionata hazırlıq ərəfəsində Azərbaycan Kiber İdman Federasiyasının (AKİF) prezidenti Ramil Əliyev ölkəmizin ilk dəfə ev sahibliyi etdiyi tədbirin əhəmiyyətini belə vurğulayıb: “Ən böyük uğurumuz Kompüter Oyunları üzrə VI Dünya Çempionatının Azərbaycanda keçirilməsidir. Bu, təkcə post-sovet məkanında deyil, həm də regionda ilk belə irimiqyaslı tədbirdir. Kiber İdmanı Federasiyası bu uğura Beynəlxalq Kiber İdmanı Federasiyasındakı 3 illik üzvlüyü ərzində nail olub. Rusiyadan sonra “İeSF”-ə daxil olmuş ikinci dövlətik”.

İLHAMƏ