Ərəblər “Bakı Ağ Şəhər”də olub

Azərbaycanda səfərdə olan Birləşmiş Ərəb Əmirliklərinin iqtisadiyyat naziri Sultan Bin Səid Əl Mansoorinin rəhbərlik etdiyi nümayəndə heyəti noyabrın 18-də “Bakı Ağ Şəhər”də olub.

Teleqraf.com-un məlumatına görə, “Bakı Ağ Şəhər” layihəsi barədə BƏƏ nümayəndə heyətinə ətraflı məlumat verilib, layihənin “2006-2010-cu illərdə Azərbaycan Respublikasında ekoloji vəziyyətin yaxşılaşdırılması üzrə kompleks Tədbirlər Planı” çərçivəsində həyata keçirildiyi, dünyada ekoloji baxımdan regenerasiya olunan sənaye zonasında həyata keçirilən, ən iri müasir layihələrdən olduğunu qonaqların diqqətinə çatdırılıb. Bildirilib ki, keçmişdə “Qara şəhər” kimi tanınan bu ərazidə yeni inkişaf layihəsinə uyğun olaraq, hazırda beynəlxalq səviyyədə müasir və böyük yaşayış mərkəzi yaradılır, inzibati və kommersiya obyektləri, istirahət və turizm mərkəzləri tikilir, dənizkənarı bulvarın davamı salınır.

BƏƏ nümayəndə heyəti “Bakı Ağ Şəhər”də aparılan işlər, landşaft dizaynı və s. ilə tanış olub. “Bakı Ağ Şəhər” layihəsinə investisiya qoyulması imkanları qonaqların diqqətinə çatdırılıb, layihə barədə videoçarx nümayiş olunub.

BƏƏ nümayəndə heyəti tərəfindən layihəyə yerli və xarici investorların cəlb edilməsi üçün yaradılan əlverişli şərait yüksək qiymətləndirilib.

Naibə QURBANOVA