Ruslan Əliyev Birlik əməkdaşlarına təşəkkür etdi

"Azəriqaz" İstehsalat Birliyinin baş direktoru Ruslan Əliyev Şamaxı rayonunda bir qrup Birlik əməkdaşı ilə görüşüb.

Bu barədə Teleqraf.com-a İstehsalat Birliyindən məlumat verilib.

Bildirilir ki, görüşdə Birlik rəhbəri ilə yanaşı, baş direktorun əsaslı tikinti üzrə müavini Ramil İsgəndərov da iştirak edib. Baş direktor hər bir əməkdaşın iş şəraiti ilə yanaşı, mövcud vəziyyətləri ilə də yaxından maraqlanıb. Birlik əməkdaşlarının hər birinə problem və təkliflərini səsləndirmələri üçün imkan yaradılıb.

Birlik rəhbəri nəzarətçi-çilingərlərin üzərinə böyük məsuliyyət düşdüyünü bildirib. "Görülən işlərin çox hissəsi məhz nəzarətçi-çilingərlərin əziyyətinizin bəhrəsidir. Buna görə də mən sizə təşəkkür edirəm", deyə Ruslan Əliyev vurğulayıb.

Daha sonra baş direktor Ağsu Regional qaz istismarı İdarəsinin tabeliyində olan Ağsu, Şamaxı, Qobustan, Kürdəmir, Ucar, Göyçay və İsmayıllı xidmət sahələrinin ümumilikdə 28 əməkdaşını "Azəriqaz" İstehsalat Birliyində faydalı işinə, nümunəvi əmək fəaliyyətinə və Həmkarlar İttifaqı hərəkatında fəal iştirakına görə Fəxri fərman və qiymətli hədiyyə ilə mükafatlandırıb.

Ruslan Əliyev görüşdə iştirak bütün əməkdaşlara gələcək işlərində uğurlar arzulayıb. Həmçinin Birlik əməkdaşları da səmimi münasibətə və görüşə görə baş direktora təşəkkür ediblər.