Ayaz Mütəllibov dəfn edildi - Foto/Yeni

Müstəqil Azərbaycanın ilk prezidenti olmuş Ayaz Mütəllibov Birinci Fəxri Xiyabanda dəfn olunub.

Teleqraf.com-un məlumatına görə, əvvəlcə mərhum eks-prezidentin ruhuna dualar oxunub. Daha sonra Yasin surəsindən ayələr səsləndirilib.

Dəfn mərasimində Ayaz Mütəllibovun ailə üzvləri, doğmaları, eləcə də tanınmış ictimai-siyasi xadimlər də iştirak ediblər.

Qeyd edək ki, 84 yaşlı eks-prezident ötən gecə uzun sürən ağır xəstəlikdən sonra dünyasını dəyişib. O, 1991-92-ci illərdə Azərbaycan Respublikasının Prezidenti olub.

* *

14:14

Bu dəqiqələrdə Azərbaycanın eks-prezidenti Ayaz Mütəllibovla vida mərasimi başa çatıb.

Teleqraf.com-un verdiyi məlumata görə, eks-prezidentlə vida mərasimi Dövlət Təhlükəsizlik Xidmətinin Şəhriyar adına Mədəniyyət Sarayında gerçəkləşib. İslam dininin qaydalarına uyğun olaraq əvvəlcə dini ayinlər icra olunub. Eks-prezidentin ruhuna dualar oxunub. Daha sonra mərhum prezident dəfn olunmaq üçün birinci Fəxri Xiyabana yola salınıb.

Ayaz Mütəllibovun dəfni bu gün saat 15:00-da Birinci Fəxri Xiyabanda baş tutacaq.

Qeyd edək ki, 84 yaşlı Ayaz Mütəllibov ötən gün dünyasını dəyişib. O, 1991-92-ci illərdə Azərbaycana rəhbərlik edib.

* * *

13:20

Azərbaycanın eks-prezidenti Ayaz Mütəllibovla vida mərasimi keçirilir.

Teleqraf.com-un məlumatına görə, eks-prezidentlə vida mərasimi Dövlət Təhlükəsizlik Xidmətinin Şəhriyar adına Mədəniyyət Sarayında gerçəkləşir.

Mərasimdə mərhumun ailə üzvləri, yaxın qohumları, eləcə də tanınmış dövlət və ictimai xadimlər iştirak edirlər.

Vida mərasimində mərhumun nəvəsi Tahir Mütəllibov bildirib ki, Ayaz Mütəllibov hamını sevən görkəmli adam idi: "Onun ölümü bizim üçün böyük itkidir. Babam siyasətlə maraqlanırdı və birlikdə müzakirə edirdik. Sonuncu dəfə bir ay əvvəl danışmışıq. Səhhətində yaranan problemə tez-tez danışa bilmirdik. Ötən gün dünyasını dəyişəndə yanında idik".

Dəfn bu gün saat 15:00-da Birinci Fəxri Xiyabanda olacaq.

Qeyd edək ki, 84 yaşlı Ayaz Mütəllibov ötən gün dünyasını dəyişib. O, 1990-92-ci illərdə Azərbaycana rəhbərlik edib.