Şəmkirdə işsizlərə 220-dən çox boş iş yeri təklif ediləcək

Əmək və Əhalinin Sosial Müdafiəsi Nazirliyi (ƏƏSMN) bölgələrdə əmək yarmarkalarını davam etdirir.

Nazirliyin İctimaiyyətlə əlaqələr şöbəsindən Teleqraf.com-a verilən məlumata görə, növbəti Əmək yarmarkasının 26 noyabrda Şəmkir rayonunda keçirilməsi nəzərdə tutulur. Əhməd Cavad adına Mədəniyyət Mərkəzində təşkil olunacaq aktiv məşğulluq tədbirində 22 müəssisə üzrə əsasən 226 boş (vakant) iş yeri işsiz və işaxtaran vətəndaşların seçiminə təqdim olunacaq. Tədbirdə boş iş yeri təqdim edən müəssisələrin nümayəndələri də iştirak edəcək.

ƏƏSMN tərəfindən cari ilin əvvəlindən bu günədək ölkənin 58 rayon və şəhərində Əmək yarmarkaları keçirilib. Bu tədbirlərdə 5666 nəfər vətəndaşa boş iş yerlərinə göndəriş verilib, 464 nəfər peşə hazırlığına, 275 nəfər ödənişli ictimai işlərə cəlb edilmək üçün qeydiyyata alınıb.

Naibə QURBANOVA