5 İyul 2022 12:17
795
12 Punto 14 Punto 16 Punto 18 Punto

İrəvanın Təpəbaşı məhəlləsindəki abidələrin bazası yaradılıb.

Teleqraf.com xəbər verir ki, bunu “İrəvan şəhərində Azərbaycan milli-mədəni, tarixi irsinin sonuncu qalığı Təpəbaşı məhəlləsinin taleyi: Ermənistanda Azərbaycan xalqının irsinin dağıdılması və tarixi izlərin silinməsi” üzrə araşdırmanın müəllifi tədqiqatçı, tarixçi Səbuhi Hüseynov deyib.

Onun sözlərinə görə, materialların hazırlanmasında Azərbaycanın Milli Arxivində, ölkəmizin Dövlət Tarix Arxivində, Amerika Birləşmiş Ştatları Konqres Kitabxanasının Nadir Əlyazmalar Kolleksiyasında, Türkiyə Respublikasındakı Osmanlı Arxivində, Rusiya Federasiyasının Dövlət Arxivində saxlanılan sənədlərdən istifadə olunub və üçüncü dövlətlərin arxivlərində saxlanılan Ermənistan Arxivindən götürülmüş mikrofilmlər tədqiqata cəlb edilib.

Səbuhi Hüseynov həmçinin mövzunun araşdırılmasında ilk dəfə Coğrafi İnformasiya Sistemi mühitində günümüzə qədər məlum olan hərbi topoqrafik xəritələr və şəhər planlarının inteqrasiya edilməsi sayəsində tarixi şəhər landşaftının müəyyən edildiyini, məkana bağlı müxtəlif təhlillərin aparıldığını, vaxtilə İrəvanın Təpəbaşı hissəsində mövcud olmuş memarlıq abidələrinin dəqiq koordinatları müəyyən edilməklə onların məhv edilmə dövrlərinin dəqiqləşdirildiyini bildirib: "Hazırda İrəvan şəhərinin Təpəbaşı hissəsindən yalnız Təpəbaşı məhəlləsinin ərazisi müəyyən edilərək mövcud abidələrin bazası yaradılıb. Məlum olub ki, burada 300-dən çox yaşayış evi mövcuddur”.

Araşdırma müəllifi Təpəbaşı məhəlləsindəki Göy məsciddən də danışıb: "Təpəbaşı məhəlləsindəki Göy məscid İran deyil, Azərbaycan məscidi kimi tanınmalıdır. Məscidin idarə olunmasına dair bütün sənədlər Azərbaycandadır. Şeyxülislamın arxivində orada işləyən azərbaycanlıların siyahısı var. Bütün bu faktları sübut edən sənədlər çoxdur".


Müəllif: Yeganə Oqtayqızı