Azərbaycanın ilk portalının 20 yaşı oldu

Azərbaycanın media məkanında ilk veb-sayt olan science.gov.az bu yaxınlarda 20 illik yubileyini qeyd etməyə hazırlaşır. AMEA-nın rəsmi veb-portalı olaraq www.ab.az adı ilə 1995-ci ildə istismara verilmiş science.gov.az 2001-ci ildə AMEA Rəyasət Heyətinin qərarı ilə AMEA İnformasiya Texnologiyaları İnstitutuna həvalə edilib.

AMEA Rəyasət Heyəti aparatının İctimaiyyətlə əlaqələr və elmin populyarlaşdırılması idarəsindən Teleqraf.com-a verilən məlumata görə, portalın əsas əsas məqsədi akademiya haqqında müvafiq məlumatların, onun çoxşaxəli fəaliyyətinin Azərbaycan və dünya ictimaiyyətinə çatdırılması, həmçinin AMEA əməkdaşlarının beynəlxalq elmi informasiya məkanı ilə əlaqələrinin təmin edilməsidir. Bundan əlavə, portalda Prezident tərəfindən elm və təhsil sahəsində imzalanmış rəsmi sənədlər, AMEA Rəyasət Heyətinin rəsmi sənədləri, eləcə də AMEA-nın dövri nəşrləri yerləşdirilir.

Bakı Dövlət Universitetinin jurnalistika fakültəsinin çoxsaylı tələbələri veb-jurnalistika sahəsində kadr hazırlığı məktəbini məhz science.gov.azportalında işləyərək təcrübə qazanıblar. Həmin fakültənin tələbələri üçün institutda təşkil olunmuş təcrübə kurslarında ümumilikdə 300 tələbə iştirak edib. Eləcə də ölkənin bir çox tanınmış saytlarında fəaliyyət göstərən media mütəxəssisləri science.gov.az-ın yetirmələri olub.

SEVİL