YAP ağacəkmə kampaniyası keçirib

Siyavuş Novruzov: “Yaşıllaşdırma kampaniyasının həyata keçirməsi bir ənənədir”

Bu gün Yeni Azərbaycan Partiyasının, Nərimanov rayon İcra Hakimiyyətinin və İDEA İctimai Birliyinin birgə təşkilatçılığı ilə ağacəkmə kampaniyası keçirilib. Tədbirdə YAP İdarə Heyətinin və Siyasi Şurasının üzvləri, Milli Məclisin deputatları, YAP fəalları və ictimaiyyət nümayəndələri iştirak ediblər.

Baş nazirin müavini, YAP sədrinin müavini-icra katibi Əli Əhmədov milli lider Heydər Əliyevin doğum günü ərəfəsində bu kampaniyanın keçirilməsnin ənənə halını aldığını qeyd edib. Bu ənənənin gələcəkdə də davam etdiriləcəyini deyən Ə.Əhmədov bildirib ki, ağacəkmə kampaniyası Bakının ekologiyasının yaxşılaşdırılmasına böyük bir töhfədir. “Bu gün Bakının Nərimanov rayonunda böyük yaşıllıq zolağı salınmaqdadır. Biz bundan əvvəl də burada ağaclar əkmişik. Hesab edirəm ki, bu, YAP-ın fəallarının Bakı şəhərinin yaşıllıq zonalarının artırılmasına bir töhfəsidir. Bir neçə ildən sonra bu ağaclar böyüyərək ekologiyaya öz töhfəsini verəcək”, – deyə YAP sədrinin müavini vurğulayıb.

Qeyd edək ki, kampaniya çərçivəsində ətraf ərazi tullantılardan təmizlənərək burada mövcud olan yaşıllığa aqrotexniki qulluq edilib və ərazidə 350-dən artıq müxtəlif növ ağac əkilib.

“Yeni Azərbaycan Partiyasının yaşıllaşdırma kampaniyası həyata keçirməsi bir ənənədir. Partiyamız mütəmadi olaraq belə kampaniyalar keçirir”. Bu fikirləri isə YAP icra katibinin müavini, Milli Məclisin deputatı Siyavuş Novruzov deyib.

S.Novruzov bildirib ki, bu gün keçirilən ağacəkmə kampaniyası da bu ənənənin davamıdır. Onun sözlərinə görə, partiyanın Milli Məclisdə təmsil olunan deputatları, rayon və şəhər təşkilatlarının fəalları bu işə qoşulub. “Ümumilikdə, YAP mütəmadi olaraq ağacəkmə mövsümündə yaşıllaşdırma aksiyası həyata keçirir. Bu məsələ daim diqqət mərkəzindədir. İndiki aksiya zamanı partiyamızın üzvləri tərəfindən xeyli sayda ağac əkilib ki, bu da savab işdir. Hesab edirik ki, biz burada çox gözəl bir meşə massivi yaradacağıq. Çünki biz bundan öncə də Bayılda çox gözəl bir meşə zolağı salmışdıq. Demək olar ki, orada illərlə belə aksiyalar keçirilib. Hazırda isə biz Nərimanov rayonunda bu aksiyanı həyata keçiririk”, – deyə YAP icra katibinin müavini vurğulayıb.

Səxavət