“Bölgələrdən paytaxta” – İsmayıllı rayonunun təqdimatı

Mədəniyyət və Turizm Nazirliyinin "Bölgələrdən paytaxta" layihəsi çərçivəsində regionlarımızın sosial-iqtisadi inkişafının, mədəni irsinin, el sənətkarlığının, bədii kollektivlərin, turizm imkanlarının təqdimatları davam edir. Layihə üzrə növbəti təqdimat İsmayıllı rayonuna həsr olunub.

Teleqraf.com xəbər verir ki, Bakı Şəhər Mədəniyyət və Turizm İdarəsi və İsmayıllı rayon Mədəniyyət və Turizm şöbəsinin təşkilatçılığı ilə Azərbaycan Dövlət Gənc Tamaşaçılar Teatrında keçirilən tədbirin iştirakçıları əvvəlcə rayonun sosial-iqtisadi inkişafını, mədəniyyətini, adət-ənənələrini, mətbəx nümunələrini, dekorativ tətbiqi sənət ustalarının əl işlərini, bölgənin turizm infrastrukturunu əks etdirən sərgi ilə tanış olublar.

Sərgidə rayonda istehsal olunan ərzaq və kənd təsərrüfatı malları, İsmayıllı haqqında kitablar, rəsm əsərləri, dekorativ sənət və digər mədəniyyət nümunələri haqqında ətraflı məlumat verilib.
Daha sonra keçirilən mərasimdə çıxış edən mədəniyyət və turizm naziri Əbülfəs Qarayev "Bölgələrdən paytaxta" layihəsinin uğurla davam etdiyini bildirib: “Keçirilən təqdimat layihə çərçivəsində keçirilən altıncı tədbirdir. Bu təqdimat onu göstərir ki, layihə getdikcə daha maraqlı və geniş miqyas alır. Biz bunu burada nümayiş olunan sərgidə əyani olaraq gördük".

Nazir vurğulayıb ki, qədim tarixə və mədəniyyətə malik İsmayıllı rayonu, digər bölgələrimiz kimi yeni inkişaf dövrünü yaşayır. Prezident İlham Əliyev tərəfindən təsdiq edilmiş regionların sosial-iqtisadi inkişafına dair dövlət proqramlarının icrası nəticəsində yerlərdə yeni mədəniyyət və turizm obyektləri yaradılır. Ölkəmizin dünyada tanıdılması üçün də böyük işlər görülür. Azərbaycan mədəniyyətinin nümunələri UNESCO-nun siyahılarına daxil edilir. Bu işdə Heydər Əliyev Fondunun prezidenti Mehriban Əliyevanın böyük xidmətləri var. İsmayıllı rayonu da xalq sənətkarlığının, mədəni irsimizin zəngin tarixi ilə tanınan bölgələrimizdəndir”.

Qeyd olunub ki, İsmayıllıda müxtəlif xalqların nümayəndələri mehriban şəraitdə yaşayır: "İsmayıllı rayonu ölkə başçısının siyasətinin əsas xətlərindən birini təşkil edən xalqımızın multikultiralizm ənənələrinin daha da gücləndirilməsini özündə əyani təcəssüm etdirir. Burada müxtəlif xalqların nümayəndələrinin birgə yaşam tərzi dünyaya bir nümunə ola bilər. Bizim hər rayonumuzun, hər kəndimizin belə özünəməxsusluğu var. Bu Azərbaycan xalqının mədəni, mənəvi zənginliyini bir daha sübut edir".

Əbülfəs Qarayev qeyd edib ki, füsunkar təbiəti, etnik müxtəlifliyi ilə seçilən İsmayıllı rayonu son illər turizmin inkişaf etdiyi bölgələrimizdəndir. Ölkəmizin digər bölgələri kimi, İsmayıllı rayonunun da turizm imkanları genişlənir. Ölkəmizdə keçiriləcək I Avropa Oyunlarına gələn xarici turistlər də İsmayıllıya səfər edərək, bölgənin zəngin folkloru, gözəl mətbəxi, mehriban və qonaqpərvər insanları ilə tanış olmaq imkanı da əldə edəcəklər".

İsmayıllı Rayon İcra Hakimiyyətinin başçısı Mirdaməd Sadıqov çıxış edərək son illər bölgədə aparılan tikinti-quruculuq işlərindən, sosial layihələrdən danışıb. Vurğuladı ki, ölkə başçısının diqqət və qayğısı rayonda abadlıq işləri aparılır, müasir infrastruktur yaradılır. Rayona qoyulan investisiyalar ildən-ilə artır, mədəniyyət və turizm imkanları da genişlənir.

Sonra rayonun tarixini əks etdirən videoçarx nümayiş olunub.

Tədbir İsmayıllının incəsənət ustalarının konserti ilə davam edib.

İLHAMƏ