Avtobus sürücülərindən bayram jesti

Ramazan bayramı münasibətilə paytaxtda fəaliyyət göstərən bəzi ictimai nəqliyyat vasitələri iyulun 17-də və bu gün – iyulun 18-də sərnişinlərə pulsuz xidmət göstərəcəklər.

Publika.az xəbər verir ki, 65 saylı marşrut avtobusunun sürücülərindən biri idarə etdiyi avtobusda bu barədə bildiriş (Ramazan bayramı ilə əlaqədar gediş haqqı pulsuzdur) yapışdırıb. O, bu addımı atmalarını İslamın ən müqəddəs bayramı ilə əsaslandırıb.

Bu müqəddəs günlə əlaqədar daha bir xeyirxah addımı isə 13 saylı marşrut avtobusunun sürücüsü atıb. O da iyulun 17-də, günorta və şam namazları vaxtı sərnişinləri öz ünvanlarına pulsuz aparıb. Bununla bağlı məlumat verən sərnişinlərdən biri qeyd edib ki, sürücü bu gün də namaz vaxtı sərnişinlərdən gediş haqqı almayacağını deyib.