4 Dekabr 2015 17:20
701

AMEA Şərqşünaslıq İnstitutunda 1941-1946-cı illərdə İran xalqlarının və cənubi azərbaycanlıların milli-demokratik hərəkatına həsr olunmuş kitablar işıq üzü görüb.

İnstitutun mətbuat xidmətindən Teleqraf.com-a verilən məlumata görə, kitablardan biri Şərqşünaslıq İnstitutunun Cənubi Azərbaycan şöbəsinin aparıcı elmi işçisi Əkrəm Rəhimlinin “21 Azərə gedən yol. Güney Azərbaycanda milli-demokratik hərəkat (1941-1946-cı illər)” kitabıdır.

Oxuculara təqdim olunan bu kitabda 1941-1946-cı illərdə Güney Azərbaycandakı milli-demokratik hərəkatdan bəhs olunur. Bakı, Tehran, Vankuver (Kanada) şəhərlərindəki çapından sonra oxuculara təqdim olunan kitabın IV – yenidən işlənmiş nəşridir. Kitabda 21 Azərə (12 dekabr) gedən mübarizə yolu tədqiq və təhlil edilir. Oxucu kitabda keçən yüzilliyin 40-cı illərində Güney Azərbaycandakı sosial, siyasi, iqtisadi və mədəni durum, olayların məzmun və mahiyyəti, 21 Azərin qələbəsindən sonra yaradılmış Azərbaycan Milli Hökumətinin fəaliyyəti ilə tanış olacaq.

Azərbaycan Milli Hökumətinin süqutunun səbəbləri, Azərbaycanda irticanın yenidən baş qaldırması və şah rejiminin qanlı olayları ilkin mənbələrdəki faktlar və sənədlər əsasında təqdim edilir.

Digər kitab isə Şərqşünaslıq İnstitutunun Cənubi Azərbaycan şöbəsinin müdiri Səməd Bayramzadənin tərtib etdiyi “21 AZƏR-70” fotoalbomudur. Təqdim olunan albomda millətimizin mübarizə tarixinin bir hissəsi əks olunur. Albomu vərəqləyən hər bir soydaşımızın zehnində 1945-1946-cı illərdə Arazın o tayında – Cənubi Azərbaycanda baş vermiş milli-demokratik hərəkat, Azərbaycan Milli Hökuməti, onun birillik fəaliyyəti, dövlətçilik tariximizdə bu hərəkatın yeri və rolu, qoyduğu izlər və təsirlər yetərincə öz qiymətini alacaqdır.

Üçüncü kitab bu günlərdə Şərqşünaslıq İnstitutunda keçirilmiş “21 Azər” mövzusunda elmi konfransın materiallarını əhatə edir. Topluya 21 Azər hərəkatının tarixinə, bu hərəkatın bədii ədəbiyyatda, mətbuatda əksinə aid və s. materiallar yer alıb.

SEVİL


Müəllif: