TQDK Beynəlxalq Bankın işçilərinin bilik səviyyəsini yoxlayacaq

Tələbə Qəbulu üzrə Dövlət Komissiyası (TQDK) Azərbaycan Beynəlxalq Bankının (ABB) müraciəti əsasında adıçəkilən bankda çalışan əməkdaşların bilik səviyyəsinin müasir tələblərə uyğunluğunu müəyyənləşdirmək üçün test imtahanı keçirəcək.

Komissiyadan Teleqraf.com-a verilən məlumata görə, imtahanda ABB-nin 710 nəfər əməkdaşının iştirakı nəzərdə tutulur.

ABB-nin işçilərinin biliyinin qiymətlədirilməsi dörd istiqamət - Xəzinə işi, Əməliyyat işi, Kredit işi və Mühasibat işi üzrə aparılır və iştirakçılara 100 test tapşırığı təqdim olunur. Bunlardan 85 sual bank sektoruna və qanunvericiliyə aid suallar, 15-i isə məntiqi nəticə çıxarma qabiliyyətini müəyyən edən suallardır.

İmtahan dekabrın 19-da iki növbədə təşkil olunacaq. Hər imtahan 3 saat ərzində aparılacaq.