Nazir: “Azərbaycan idman tədbirlərinin keçirildiyi məkanlara çevrilir”

“Sərhədçi” çövkən milli oyunu üzrə Prezident Kuboku yarışının qalibi olub.

Binə Atçılıq Mərkəzinin örtülü manejində milli çövkən oyunu üzrə Prezident Kubokunun X yarışının qalibləri müəyyən edilib. Yarış Atçılıq Federasiyasının təşəbbüsü ilə keçirilib.

Final yarışından əvvəl mədəniyyət və turizm naziri Əbülfəs Qarayev və Atçılıq Federasiyasının prezidenti Elçin Quliyev çıxış ediblər.

Nazir Əbülfəs Qarayev bildirib ki, Prezident Kuboku yarışlarının keçirilməsi ənənəyə çevrilib: “Yarışların əsas məqsədi Azərbaycan xalqının mədəni irsinin qorunub saxlanması, milli çövkən oyununun inkişafı üzrə dövlət siyasətinin dəstəkləmək, ən güclü idmançıları və komandaları üzə çıxarmaqdır. Bildiyiniz kimi, Azərbaycan təkcə beynəlxalq idman tədbirlərində iştirak etmir, həm də bu cür tədbirlərin keçirildiyi məkanlardan birinə çevrilir. Bu isə ölkəmiz haqqında həqiqətlərin dünya ictimaiyyətinə çatdırılmasına imkan yaradır”.

Atçılıq Federasiyasının prezidenti Elçin Quliyev bildirib ki, ölkənin müxtəlif regionlarından bu cür yarışlarda iştirak edən komandaların sayı ildə-ilə artır: “Bu, atçılıq idman növünün uğurlu inkişafının və bu sahəyə Azərbaycanda maraq səviyyəsinin artmasının göstəricisidir. Bu ilin sentyabr ayında Bakıda polo üzrə ilk Avropa çempionatı keçirilib. Komandamız çempionatda qələbə qazanıb. Atçılıq idmanının müxtəlif növləri üzrə müntəzəm keçirilən yarışların məqsədlərindən biri Qarabağ cins atlarının qorunub saxlanması və çoxaldılmasına, habelə atçılıq idman növünə və milli atçılığın inkişafına kömək göstərməkdir”.

Final turnirində əvvəlcə üçüncü yer uğrunda mübarizə aparan “Ağstafa” və “Polad” komandaları qarşılaşıblar. “Polad” komandası birinci taymda yeganə qolu vurmaqla rəqibinə qalib gəlib. Sonra mükafatlandırma mərasimi keçirilib. Bütün iştirakçılara fəxri diplomlar, medallar və pul mükafatları verilib.

“Sərhədçi” komandası turnirin əsas mükafatı olan Prezident Kubokuna sahib olub.

İLHAMƏ